"Дунё" МАның хабар бериўинше, Өзбекстан санлы технологиялар орайының ашылыўы санластырыў, жоқары технологиялар ҳәм инновациялық раўажланыў тараўындағы Өзбекстан-Қытай бирге ислесиўин беккемлеўде әҳмийетли қәдем болды.
Орай Өзбекстан Санлы технологиялар министрлигиниң басламасы менен Қытайдың "Shanghai Oriental Credits" компаниясы менен биргеликте шөлкемлестирилген. Жойбар мәлимлеме технологиялары тараўындағы компаниялар, инвесторлар, экспертлер және Өзбекстан ҳәм Қытайдың илимий ҳәм билимлендириў мәкемелери арасында тиккелей бирге ислесиўди раўажландырыўға қаратылған.
Ашылыў мәресиминде Өзбекстан санлы технологиялар министри Шерзод Шерматов басшылығындағы Өзбекстан делегациясы, сондай-ақ, еки мәмлекеттиң бизнес ҳәм технологиялық жәмийетшилигиниң ўәкиллери қатнасты.
Министр Шерзод Шерматов өзиниң шығып сөйлеген сөзинде, Орайдың ашылыўы Өзбекстанның глобал технологиялық процесслерге халықаралық интеграцияласыўы бойынша терең ойланған бағдарды сәўлелендиретуғынын атап өтти. Ол бүгинги күнде санлы трансформация миллий раўажланыў стратегиясының ажыралмас бөлеги екенин ҳәм республика регионда санлы бирге ислесиўдиң жаңа архитектурасын қәлиплестириўде белсене қатнасыў нийетинде екенин де атап өтти. Орайдың Шанхайда шөлкемлестирилиўи тек ғана Өзбекстанның технологиялық потенциалын көрсетип қоймастан, ал қытайлы шериклер менен әмелий бирге ислесиўди кеңейтиў ушын беккем тийкар жаратады.
Мәкеме Өзбекстанның технологиялық потенциалын алға қойыў, мәлимлеме технологиялары тараўында экспортқа бағдарланған компанияларды қоллап-қуўатлаў, венчур ҳәм тиккелей инвестицияларды тартыў, биргеликтеги илимий ҳәм билимлендириў жойбарларын әмелге асырыўға қаратылған көп функциялы платформаға айланады. Онда эксперт ушырасыўлары, стартап презентациялары, оқыў бағдарламалары ҳәм еки мәмлекеттиң санлы экосистемалары арасында тәжирийбе алмасыў ушын илажлар өткериледи.
"Shanghai Oriental Credits" компаниясының президенти Ху Чуан Хуа өз гезегинде орай исбилерменлик байланысларын раўажландырыў, инвестиция тартыў, алдынғы билим ҳәм технологиялық шешимлер алмасыўға хызмет ететуғынын атап өтти. Бул Өзбекстан ҳәм Қытай арасындағы кең көлемли стратегиялық шериклик шеңберинде жаңа өсиў ноқаты болыўы күтилмекте. Оның айтыўынша, компания Өзбекстанды Орайлық Азиядағы ең перспективалы шериклерден бири сыпатында қарайды ҳәм мәмлекеттиң санлы экономикасының әҳмийетли тараўларында өз қатнасын кеңейтиў нийетинде.
Шанхайда Өзбекстан санлы технологиялар орайының шөлкемлестирилиўи инновациялар, технологиялар ҳәм санластырыў орайлық орынды ийелеген Өзбекстан ҳәм Қытай арасындағы ҳәр тәреплеме стратегиялық шерикликти тереңлестириў жолындағы бағдардың логикалық даўамы болды. Бул да еки мәмлекет басшыларының кейинги жыллардағы ушырасыўларының жуўмақлары бойынша ерисилген келисимлерди турмысқа енгизиў жолындағы және бир әмелий қәдем болып есапланады.
