Мүддетли әскерий хызметти өтеў жаслар ушын табыслы жолға айланыўы керек екенлигине айрықша итибар қаратылды. Енди мүддетли әскерий хызметтиң жаңа модели қәлиплеседи. Бул арқалы армиядан қайтқан ҳәр бир әскер кәсиплик көнликпеге ийе болады.
Орынларда бул бағдардағы ҳәрекетлер баслап жиберилди. Соның ишинде, Миллий гвардия Ферғана ўәлаяты бойынша басқармасы кәсип-өнерге оқытыў системасын жолға қоймақта. Ҳәзирги ўақытта мүддетли әскерий хызметкерлер компьютер графикасы операторы, автомобиллерди оңлаўшы слесарь, кепсерлеўши ҳәм шаштәрезлик сыяқлы заманагөй ҳәм талап жоқары болған бағдарлар бойынша сертификат алыўға таярланбақта.
Кәсиплик билимлендириў агентлиги Ферғана ўәлаяты басқармасының баслығы Тойчибой Бойматов берген мағлыўматлар ўәлаятта жоқарыдағы тапсырмалардың орынланыўына жедел кирискенлигин көрсетеди.
- Енди мүддетли әскерий хызметкерлеримиз тек ғана әскерий хызметти өтеп қоймай, өз қәбилети шеңберинде бир кәсип ийеси де болып кетеди, - деди Т.Бойматов. - Әлбетте, ҳәзирги күнниң талабы - Мәлимлеме технологиялары тараўы. ИТ, шет тилсиз бүгинги турмысты көз алдымызға келтирип болмайды. Соның ушын бул бағдарларда маман қәнигелерди тартқанбыз. Олар мүддетли әскерий хызметтеги әскерлеримизге тәлим-тәрбия бериўге таяр.
Кәсиплик билимлендириў Ферғана ўәлаяты басқармасы тийкарындағы 67 техникум ҳәм кәсип-өнер орайының имканиятларынан пайдаланған ҳалда әскерий хызметкерлерге слесарь, кепсерлеўши, компьютер техникасы операторы, сондай-ақ, маркетинг бойынша қәниге, кадрлар ҳәм арнаўлы жумыслар бойынша инспектор, официант, автомобиллерди оңлаў слесары, AutoCad программист, шаштәрез ҳәм электромонтёр сыяқлы кәсип-өнерлер үйренилмекте.
Мүддетли әскерий хызметкер Самандар Турсунов әскерлердиң машиналарға техникалық хызмет көрсетиў, сантехниклик бойынша кәсип-өнер ийелеп атырғанынан қуўанышлы.
- Бул өнер бизге келешекте өз жумысымызды, орнымызды табыўымызда жәрдем береди. Себеби барлық әскерлер де белгили бир кәсипти ийелеп үлгермеген. Атап айтқанда, өзим әскерий хызмет дәўиринде техникаға хызмет көрсетиўди үйренип атырман, усы бағдар бойынша оқып атырман. Қысқа мүддетте жумысқа қолым келип, тәжирийбем артып бармақта, - дейди әскер.
Шығыс әскерий округи Ферғана гарнизонындағы әскерий бөлимлерде мүддетли әскерий хызметти өтеп атырған әскерлер ушын Ферғана қаласындағы 4-техникум менен биргеликте кәсип-өнер ҳәм шет тиллерин үйретиўге қаратылған оқыў шынығыўлары жолға қойылды.
Шығыс әскерий округи әскерлери сәркардасы орынбасары, полковник Меҳриддин Қўчқоровтың сөзлерине бола, 2025-2026-жылда хызмет етип атырған мүддетли әскерий хызметкерлерди еки ай даўамында кәсип-өнерге, қалаберсе, шет тиллерине үйретиў мақсет етилген. Буннан тысқары, Шығыс әскерий округи аймағында жайласқан Әндижан, Ферғана ҳәм Наманган ўәлаятларында да мүддетли әскерий хызметкерлерди әне усы бағдарларда оқытыў үстинде жумыс алып барылмақта.
Ферғана қаласындағы 4-техникум директоры Равшан Умаров болса бүгин әскерий хызметкерлерге хызмет етиў және кәсип ийелеў имканияты берилгени олар арқалы жәмийетке сезилерли пайда келтиретуғынын атап өтти. Оның айтыўынша, техникумға ең соңғы маркадағы әсбап-үскенелер алып келинген. Халықаралық билимлендириў бағдарламасына түскен төрт бағдарда 120 әскерге маман, илимий дәрежеси бар оқытыўшылар сабақ бермекте. Бул болса әскерлердиң бос ўақтын мазмунлы шөлкемлестириў, келешектеги кәсиплик жумысына беккем тийкар жаратыў және әскерий хызметтен кейинги турмысқа бейимлесиўин аңсатластырыўға хызмет етеди.
Мүддетли әскерий хызметкер, әпиўайы әскер Шохрух Ёқубов ИТ ҳәм әскерий хызметте керек болатуғын киберқәўипсизлик бойынша тәжирийбе арттырмақта. Ол жаратылып атырған бүгинги шараятлар жаслардың армияға қызығыўшылығын арттырыўға хызмет ететуғыны ҳаққында исеним менен айтты.
Мүддетли әскерий хызметкерлерди мийнет базарында талап жоқары кәсиплерге бағдарлаў мақсетинде қысқа мүддетли оқыў курсларына тартыў жумыслары барлық аймақларда жедел алып барылмақта. Бул өз ўақтында ҳәм дурыс ойланған ийгиликли басламалардан бири болды. Бүгин әскерий хызметти өтеп және кәсип-өнер ийеси болып кетиў қаншелли пайдалы екенин жаслар жақсы биледи.
Миллий гвардия Қашқадәрья ўәлаяты бойынша басқармасы ҳәм Қаршы қаласында жайласқан Кәсиплик көнликпелер орайы арасында өз-ара бирге ислесиў жолға қойылды. Бирге ислесиў шеңберинде мүддетли әскерий хызметкерлер белгиленген тәртипте еки айлық қысқа мүддетли оқыў курсларында билим алмақта. Ҳәзирги ўақытта олар электромонтёр, слесарь ҳәм сантехник бағдарлары бойынша кәсиплик билим ҳәм әмелий көнликпелерди ийелемекте.
Қаршы қаласындағы Кәсиплик көнликпелер орайының бас қәнигеси Хулкар Розиқулова орайдың Миллий гвардия Қашқадәрья ўәлаяты бойынша басқармасы менен кәсипке оқытыў бойынша меморандумға қол қойғанын мәлим етти. Мақсет - мүддетли әскерий хызметкерлерди кәсипке оқытыў, әскерий хызметтен қайтқанларды жумыс пенен тәмийинлеў. Оқыў курсларын табыслы тамамлаған мүддетли әскерий хызметкерлерге мәмлекетлик үлгидеги сертификатлар тапсырылыўы режелестирилген. Бул олардың әскерий хызметтен соң турақлы жумыс пенен тәмийинлениўине кең имканият жаратады.
Әҳмийетли тәреплерден бири, әскерлердиң оқыўларды жуўмақлағаны бойынша сертификатлары өзбек, рус ҳәм инглис тиллеринде рәсмийлестириледи. Бул хызметти тамамлаған жасларға тек ғана мәмлекетимизде емес, ал сырт еллерде де өз кәсиби бойынша ислеў имканиятын береди.
Әскерий хызмет дәўиринде кәсипке оқытыў системасының енгизилиўи бир неше әҳмийетли мәселелерге шешим болады. Жоқарыда айтылғанындай, жаслардың әскерий хызметти өтеўге қызығыўшылығы сезилерли дәрежеде артады. Хызметти тамамлап қайтқан жаслардың жумыссыз қалыў қәўпи азаяды. Себеби, кәсип-өнерли жасларда өз күшине исеним артады. Оларда исбилерменлик ямаса мийнет жумысын баслаўға умтылыў күшейеди. Бул болса кәмбағаллықты азайтыў, шаңарақлардың абаданлығын тәмийинлеў жолындағы ҳәрекетлеримиздиң нәтийжелилиги және де артыўын тәмийинлейди.
Муножат МУМИНОВА,
"Янги Ўзбекистон" хабаршысы
