"Билимлендириўдиң сапасын тәмийинлеў ҳәм билимлендириў хызметлерин көрсетиў системасын жетилистириў бойынша қосымша илажлар ҳаққында"ғы Президент Пәрманы (ПП-76-санлы, 05.05.2025 ж.) қабыл етилди.
Пәрманның тийкарғы мақсети билимлендириў ҳәм илимий-изертлеў шөлкемлериниң жумысын сыртқы баҳалаў механизмлерин белгилеў ҳәм көрсетилип атырған билимлендириў хызметлериниң сапасын арттырыў болып есапланады.
Пәрманға бола, Билимлендириўдиң сапасын тәмийинлеў миллий агентлиги (Агентлик) шөлкемлестириледи.
Агентлик усы тараўда арнаўлы ўәкилликли мәмлекетлик уйым есапланады.
Агентлик орта арнаўлы, кәсиплик, жоқары ҳәм жоқары билимлендириўден кейинги билимлендириў, сондай-ақ, кадрларды қайта таярлаў ҳәм олардың маманлығын арттырыў шөлкемлерин (билимлендириў шөлкемлерин) комплексли ҳәм арнаўлы мәмлекетлик аккредитациядан өткереди. Онда:
комплексли мәмлекетлик аккредитация ҳәр 5 жылда билимлендириў шөлкемлерин сыртқы баҳалаў нәтийжелери тийкарында өткериледи;
арнаўлы мәмлекетлик аккредитациясы кадрлар таярлаў жолға қойылып атырған билимлендириў бағдарламалары бойынша оқыў процеси басланыўынан алдын өткериледи.
Сондай-ақ, Агентлик билимлендириў шөлкемлери питкериўшилериниң заманагөй мийнет базары талапларына сәйкеслигин үйрениў мақсетинде Улыўмамиллий жумыс бериўшилер сораўнамасын өткереди.
Миллий маманлық системасын раўажландырыў институты Агентлик системасына өткериледи.
Агентлик директоры Президент тәрепинен лаўазымға тайынланады ҳәм босатылады және оның статусы Президент кеңесгөйиниң орынбасарына теңлестириледи.
