Таңлаў нәтийжесинде Incheon International Airport Corporation (Қубла Корея) жеңимпаз деп табылды. Бул ҳаққында Uzbekistan Airports хабар берди.
2024-жылдың 1-августында "Үргенш халықаралық аэропортын модернизациялаў ҳәм басқарыў" жойбарын "Қурылыс-басқарыў- тапсырыў" (БОТ) бойынша ашық тендер жәрияланған еди, таңлаў еки басқышта өткерилди: маманлық сораўы (РфҚ) ҳәм усыныслар сораўы (РфП). Тендерде сегиз компания қатнасты, олардан бесеўи екинши жуўмақлаўшы басқышқа өтти, соннан кейин уйымлараралық тендер комиссиясы жеңимпазды анықлады.
Атап өтилиўинше, МЖШ жойбары аэропортты модернизациялаў ҳәм басқарыў жойбарын биргеликте әмелге асырыўды нәзерде тутады. Жеке меншик шерик жолаўшы ҳәм жүк терминалларын қурыў ҳәм басқарыў, соның ишинде, жерде хызмет көрсетиў жумысларын әмелге асырады. Мәмлекетлик шерик аэродром комплексин қурыў ҳәм басқарыў (ушыў-қоныў жолы, перрон) ушын жуўапкершиликти өз мойнына алады. Жойбарға бола кейинги қәдем 19 жыллық консессия мүддетин өз ишине алған МЖШ шәртнамасын дүзиў болады.
"Таңлаў жеңимпазы болған Incheon халықаралық аэропорты тек ғана Корея Республикасының тийкарғы ҳаўа дәрўазасы емес, ал Арқа-Шығыс Азиядағы ең ири транспорт орайларынан бири болып, ол бир неше мәрте дүньяның ең раўажланған ҳәм тығыз аэропортларының 10 лығына кирген. 2024-жылдың жуўмақлары бойынша аэропорт 70 миллион жолаўшыға хызмет көрсеткен. Үргенштеги жойбарды әмелге асыратуғын жәмәәт Хорезм аэропортын жолаўшылар ушын ең заманагөй ҳәм қолайлы аэропортлардан бирине айландырып, регионның сырт елли туристлер ушын тартымлылығын арттыратуғынына ҳәм улыўма Өзбекстан авиация тараўын раўажландырыўға үлес қосатуғынына исенемиз", - деп түсиник берди "Uzbekistan Airports" компаниясы.
Үргенш халықаралық аэропортын модернизациялаў ҳәм басқарыў бойынша мәмлекетлик-жеке меншик шериклик жойбары Өзбекстан Республикасы Президентиниң 2024-жыл 30-августтағы ПҚ-308-санлы қарарының орынланыўы шеңберинде "Uzbekistan Airports" АЖ тәрепинен Транспорт және Экономика ҳәм қаржы министрликлери менен биргеликте әмелге асырылмақта.
