Илажда үш мәмлекеттиң энергетика министрлери, Жәҳән банки ўәкиллери ҳәм жойбарды қоллап-қуўатлаў ушын шөлкемлестирилген Донорларды муўапықластырыўшы кеңестиң ағзалары қатнасты. Мәжилис Жәҳән банки жәрдеминде шөлкемлестирилди.
Мағлыўмат ушын Донорлардың муўапықластырыўшы кеңеси 2024-жыл 6-июньде Жәҳән банки басшылығында шөлкемлестирилген. Оған Европа тиклениў ҳәм раўажланыў банки, Азия раўажланыў банки, Азия инфраструктуралық инвестициялар банки, Cassa Depositi e Prestiti S.p.A. (Италия), OPEC халықаралық раўажланыў қоры, Европа инвестициялық банки, Ислам раўажланыў банки ҳәм басқа да халықаралық финанс институтлары киреди.
Ушырасыўда жойбардың техникалық-экономикалық тийкарлары, басланғыш ҳүжжетлери, әмелге асырыўдың экологиялық ҳәм социаллық тәреплери, халықаралық финанс шөлкемлери менен бирге ислесиў механизмлери, 2025-жылдың октябрь-ноябрь айларында өткерилиўи режелестирилген гезектеги мәжилиске таярлық көриў мәселелери көрип шығылды.
Жойбар шеңберинде 5,4 миллиард куб метр суў сақлағыш ҳәм 1860 МВт қуўатлықтағы гидроэлектр станциясын қурыў режелестирилген. Бул ҳәр жылы дерлик 5,6 миллиард кВт/саат электр энергиясын ислеп шығарыў имканиятын береди.
Қатнасыўшылар Қамбарата ГЭС-1 Орайлық Азияда энергетикалық қәўипсизликти тәмийинлеў, регионаллық бирге ислесиўди беккемлеў ҳәм суў ресурсларынан ақылға уғрас пайдаланыўда стратегиялық әҳмийетке ийе екенин атап өтти.
Мәжилис даўамында Өзбекстан делегациясы халықаралық финанс институтлары - Европа Аўқамы, Жәҳән банки, ЕТРБ, АТРБ, OPEC қоры ҳәм басқа да донорлардың ўәкиллери менен қаржы тартыў шәртлерин додалаў бойынша бир қатар еки тәреплеме сөйлесиўлер өткерди.
Еслетип өтемиз, бул форматтағы биринши ушырасыў 2025-жыл 27-январь күни Ташкентте, екиншиси болса 26-27-май күнлери Дубайда болып өткен еди. Сол ўақытта үш мәмлекеттиң энергетика министрлери арасында келешектеги бирге ислесиў ҳаққында протоколға қол қойылған еди.
Брюсселдеги мәжилис жуўмағында тәреплер кейинги биргеликтеги ҳәрекетлер ҳәм жойбарды таярлаў мүддетлери ҳаққында келисип алды.
