Илажда Экология министрлиги ҳәм Тоғай агентлигиниң ўәкиллери, ҚХРдың Синьцзян экология ҳәм география институтының профессор-оқытыўшылары, Қытайдың Нинся-Хуэй автоном районының қәнигелери, сондай-ақ, Өзбекстанның илимий-изертлеў ҳәм жойбарлаў институтлары, соның ишинде, "Жасыл жойбар" ҳәм "Аралбойы" халықаралық инновациялық орайының илимпазлары қатнасты.
Тоғай агентлиги директоры Еркин Муҳиддинов семинарды ашып берип, Өзбекстанда Президентимиздиң басламасы менен климат өзгериўиниң алдын алыў ҳәм тоғай массивлерин тиклеў бойынша жедел жумыслар алып барылып атырғанын атап өтти. Ол жаңа галофит бағ экосистемаларды көклемзарластырыў ҳәм беккемлеўде әҳмийетли қәдем болатуғынын атап өтти:
"Жаңа галофит бағ республикада көклемзарластырыў дәрежесин арттырыў ҳәм экосистемаларды беккемлеўге хызмет етеди. Бул жумыслар турақлы ҳәм системалы түрде даўам еттириледи", - деп атап өтти Еркин Муҳиддинов.
Семинар қатнасыўшылары қурғақшылық ҳәм шорланыўға шыдамлы галофит бағларды жаратыў бойынша жойбарлар менен танысты. Галофит өсимликлерди жетистириўдиң илимий тийкарлары, суўды үнемлейтуғын технологияларды енгизиў, климаттың өзгериўи шараятында турақлы агроэкосистемаларды жаратыў мәселелери додаланды.
Қытайлы қәнигелер галофит өсимликлерди тәрбиялаў, топырақтың шорланыўын азайтыў ҳәм экологиялық турақлылықты арттырыў бойынша әмелий көргизбелер өткерип, тәжирийбелери менен бөлисти. Илаж соңында қатнасыўшылар Өзбекстан ҳәм Қытай арасындағы дослық белгиси сыпатында жаңа бағ аймағына саяманлы нәллер отырғызды.
Мағлыўмат ушын, Тоғай хожалығы илимий-изертлеў институты қәнигелери тәрепинен жергиликли шараятқа бейимлескен 122 түрдеги галофит өсимликлердиң дизими қәлиплестирилди. 2025-жылдың июнь айында ҚХР Синьцзян экология ҳәм география институты менен бирге ислесиў шеңберинде 35 түрдеги галофитлердиң улыўма салмағы 1,3 тонна болған туқымлары алып келинди.
