Фестивалдың өткерилиўи мәмлекетимиз басшысының пал ҳәррешиликти раўажландырыўға қаратып атырған итибары, тараў ўәкиллерин қоллап-қуўатлаў ҳәм оларға жаратылып атырған кең имканиятлардың көриниси болып есапланады. Илаж тараўда ерисилген жетискенликлерди көрсетиў, халықаралық тәжирийбени енгизиў, жергиликли пал ҳәррешилик дәстүрлерин үгит-нәсиятлаўда үлкен әҳмийетке ийе.
Быйылғы фестивалда 150 ден аслам жергиликли ҳәм сырт ел пал ҳәррешилери өзлериниң тәбийғый өнимлери менен қатнаспақта.
Салтанатлы ашылыў мәресиминде сырт елли мийманлар, ўәлаят жәмийетшилиги, жергиликли ҳәкимият уйымларының басшылары қатнасты.
Наманган ўәлаяты ҳәкими Шавкатжан Абдураззақов бундай илажлар туризмди раўажландырыўда үлкен әҳмийетке ийе екенин, фестиваль илим, өнерментшилик ҳәм исбилерменликти бирлестиретуғын өзине тән майдан екенин атап өтти. Сондай-ақ, қәнигелер арасында тәжирийбе алмасыў ҳәм бирге ислесиўди кеңейтиўге хызмет етеди.
Илажда Республикалық пал ҳәррешилер ассоциациясының баслығы, Қытай Халық Республикасы ҳәм Қырғызстан Республикасынан тараў ўәкиллери шығып сөйледи.
Атап өтилиўинше, фестиваль шеңберинде тек ғана пал ҳәррешиликке байланыслы емес, ал басқа да тематикалық илажлар өткерилмекте. Бүгин мийнет ярмаркасы, Наманган өнерментлери көргизбеси ҳәм спорт жарыслары болып өтеди.
Фестиваль 26-октябрьге шекем даўам етеди. Барлық қызығыўшылар илажларға қатнасыўға мирәт етиледи.
