Көргизбениң ашылыў мәресиминде дипломатиялық корпус, туризм тараўы ҳәм ғалаба хабар қуралларының ўәкиллери, мәденият ҳәм бизнес жәмийетшилигиниң ғайраткерлери қатнасты, деп хабар бермекте "Дунё" МА.
Белгили өзбек художниклериниң бийбаҳа коллекциясы көрсетилгени Өзбекстанның қатнасыўындағы айрықша ўақыя болды. Олардың миллий дәстүрлердиң байлығы ҳәм өзине тән эстетиканы сәўлелендирген полотнолары көргизбениң улыўма концепциясына үйлесикли түрде сәйкес келди ҳәм тамашагөйлерде үлкен қызығыўшылық оятты.
Өзбекстан көркем өнер мектеби мың жыллық тарийх, архитектуралық мийрас, бай өнерментшилик дәстүрлери ҳәм дүньяны философиялық түсиниў тәсиринде қәлиплескени, бул өзбек шеберлериниң дөретиўшилигин аңсат танып алыў ҳәм терең тәсирли ететуғыны атап өтилди.
Өзбекстан мәдений мийрасты қәстерлеп сақлаў ҳәм үгит-нәсиятлаўға турақлы түрде үлкен итибар қаратып атырғаны айрықша атап өтилди. Самарқандта ЮНЕСКО Бас Ассамблеясының биринши көшпели сессиясының өткерилгени бул сиясаттың халықаралық көлемдеги әҳмийетли тән алыныўы болды. Бул ўақыя мәмлекетимиздиң глобал мәдений бирге ислесиўде барған сайын белсенди роль атқарыўға умтылып атырғанын тастыйықлады.
Илаж мийманларында Өзбекстанның туризм потенциалы ҳаққындағы презентация да үлкен қызығыўшылық оятты. Қатнасыўшылар тарийхый қалалардың бай мийрасы, сийрек ушырасатуғын тәбийғый ландшафтлар, гастрономиялық имканиятлар ҳәм мәмлекеттиң заманагөй туризм инфраструктурасы менен танысыў имканиятына ийе болды.
Өзбекстан Туризм комитетиниң Қытайдағы ўәкилханасы ҳәм Шанхай туризм индустриясы ассоциациясы арасында өз-ара түсинисиў меморандумына қол қойыў мәресими бағдарламаның әҳмийетли мәселеси болды. Ҳүжжет туризм тараўындағы бирге ислесиўди кеңейтиў, туристлик өнимлерди биргеликте үгит-нәсиятлаў, туроператорлар ушын танысыў турларын шөлкемлестириў, кәсиплик тәжирийбе алмасыў ҳәм еки мәмлекет арасында туристлер ағымын көбейтиў ушын шараятлар жаратыўға қаратылған.
Көргизбе мийманлары бул илаж Өзбекстан ҳәм Қытай арасындағы мәдений-гуманитарлық байланысты беккемлеўде әҳмийетли қәдем болғанын, көркем өнер, туризм ҳәм аймақлараралық байланыслар тараўындағы бирге ислесиўди буннан былай да раўажландырыў ушын жаңа имканиятлар ашып атырғанын атап өтти.
