Илажда 200 ге шамалас адам, соның ишинде, жаслар, илимий топарлар, ҳәкимият уйымлары, пуқаралық жәмийети ҳәм жеке меншик сектор ўәкиллери қатнасты.
Қатнасыўшыларға агроазық-аўқат системаларын және де турақлы ҳәм экологиялық келешек тәрепке трансформациялаўға қаратылған инновациялық шешимлер ҳәм илимий қолланбалар таныстырылды.
Илаж Өзбекстанда 2025-жылды "Қоршаған орталықты қорғаў ҳәм жасыл экономика жылы" деп жәриялаўға бағышланды. Бул мәмлекеттиң климат өзгериўи, биологиялық көп түрлиликтиң жоқ болыўы, қоршаған орталықтың патасланыўы ҳәм аўыл хожалығын жүргизиўдиң турақсыз усылларын қолланыў сыяқлы глобал машқалаларды шешиўге умтылып атырғанын тастыйықлады.
Илаж "жасыл" аўыл хожалығы бойынша регионаллық техникалық платформа, Илим ҳәм инновациялар бойынша ФАО форумы, Европа ҳәм Орайлық Азия ушын регионаллық илим ҳәм инновациялар ҳәптелиги сыяқлы глобаллық ҳәм регионаллық басламалардың даўамы болды. Бул басламалардың барлығы турақлы, инклюзив ҳәм климатқа мөлшерленген азық-аўқат системаларын қәлиплестириўде илим ҳәм инновациялардың әҳмийетин көрсетеди.
Бағдарлама шеңберинде аўыл хожалығы министрлиги жанындағы Агро тараўды санластырыў орайының "Агроплатформа" мәлимлеме системасы, ТМАУ тәрепинен өсимликлерди қорғаўдың биологиялық усыллары, "Өзбеккосмос" агентлигиниң аўыл хожалығында космослық технологиялар ҳәм дронлардан пайдаланыў сыяқлы алдыңғы баслама ҳәм технологиялар көрсетилди. ФАО илимий көзқарасларды енгизиў бойынша өзиниң әмелий тәжирийбеси менен бөлисти, БМШтың Ықтыярлылар бағдарламасы болса волонтёрлық ҳәм жаслардың белсене қатнасыўының әҳмийетин атап өтти.
Қатнасыўшыларды тартыў ушын интерактив бағдарлама, соның ишинде, жасыл илим, инновациялар ҳәм ФАО жумысы бойынша викторина өткерилди. Жуўмақлаўшы сессияда жеңимпазлар сыйлықланды.
Азық-аўқат қәўипсизлиги ФАОның тийкарғы ўазыйпасы екени, бул процессте жер ресурсларынан ақылға уғрас пайдаланыў оғада әҳмийетли екени атап өтилди. Оларды басқарыўдың инновациялық усыллары аўыл хожалығы өнимлериниң сапасын арттырыў, климат өзгерислерине бейимлесиў ҳәм олардың ақыбетлерин азайтыўға хызмет етеди.
"Жасыл илим ҳәм инновациялар күни" миллий ҳәм жергиликли дәрежелерде билим алмасыў ҳәм фактлерге тийкарланған шешимлер ислеп шығыў ушын және бир платформаға айланды. Сондай-ақ, Өзбекстанда турақлы аўыл хожалығы ҳәм қоршаған орталықты қорғаў ушын шерикликти раўажландырыў ҳәм ресурсларды жумсаўға жәрдемлеседи.
