Илажлар Экология ҳәм климат өзгериўи миллий комитети тәрепинен Жол ҳәрекети қәўипсизлиги хызмети менен биргеликте "Атмосфера ҳаўасын қорғаў ҳаққында"ғы Өзбекстан Республикасы Нызамының 16, 17, 28-статьялары ҳәм "Экологиялық қадағалаў ҳаққында"ғы Нызамның 11-статьясы талапларын орынлаў мақсетинде өткерилмекте.

Акция шеңберинде республикамыз бойлап биринши басқыш 10-апрельден 10-майға шекем өткерилди. Бул дәўирде қәнигелер тәрепинен 288 мың 755 автотранспорт қуралы тексерилип, пайдаланылған газлердиң қурамындағы патасландырыўшы элементлер арнаўлы әсбаплар жәрдеминде өлшенген.

Бақлаў нәтийжелерине бола, 1 мың 384 автотранспорт қуралында (0,5 процент) шығынды газлеринде патасландырыўшы элементлер муғдары белгиленген нормативлерден асқанлығы анықланған. Бул автотранспорт қураллары бойынша анықланған нызамбузыўшылықларды сапластырыў ҳәм көрсеткишлерди белгиленген нормаларға муўапықластырыў илажлары көрилди. Сондай-ақ, илажлар даўамында ислеп шығарылған газлердеги патасландырыўшы элементлер муғдары бойынша мәмлекетлик стандартларда белгиленген нормативлерди қопал бузған 446 айдаўшы анықланды. Оларға ЖҲҚБ хызметкерлери тәрепинен Өзбекстан Республикасының Ҳәкимшилик жуўапкершилик ҳаққындағы кодексине муўапық илажлар көрилди.

Жол-патруль хызметиниң турақлы постлары, көшелер, автотранспорт кәрханаларының кирип-шығыў орынларында тексериў жумыслары алып барылды. Жол қойылатуғын нормалардан асқан транспорт қураллары анықланған жағдайда, олар зәрүр оңлаў жумыслары әмелге асырылғанға шекем ўақтынша тоқтатып турылған. Әмелге асырылған илажлар нәтийжесинде, қәнигелердиң есап-санақларына бола, атмосфера ҳаўасына 836 тонна патасландырыўшы элементлер шығарылыўының алды алынды.

Экологиялық қәўипсизликти тәмийинлеў, автотранспорт қуралларының атмосфера ҳаўасы сапасына унамсыз тәсирин азайтыўда "Таза ҳаўа" айлығы айрықша әҳмийетке ийе. Бақлаў белгиленген экологиялық талапларға жуўап бермейтуғын транспорт қуралларын өз ўақтында анықлаў ҳәм нызамбузыўшылықларды сапластырыў илажларын көриў имканиятын береди.

Республикамыз аймақларында "Таза ҳаўа" айлығының екинши басқышы 10-августтан 10-сентябрьге шекем даўам етеди. Ташкентте екинши басқыш 10-сентябрьден 10-октябрьге шекем өткериледи.

Екинши басқыш шеңберинде автомобиль жоллары, жол-патруль хызмети постлары, автотранспорт кәрханаларының аймақлары ҳәм объектлеринде қадағалаў илажлары даўам еттириледи. Айдың барысы ҳәм оның нәтийжелери ҳаққындағы мағлыўматлар ғалаба хабар қураллары ҳәм социаллық тармақларда кеңнен сәўлелендириледи.