Өткен жылдың 31 желтоқсанында Жызақ облысының әлеуметтік-экономикалық дамуын жеделдету жөнінде Президент қаулысы қабылданып, маңызды мәселелер шешімін тапқан еді. Атап айтқанда, 2025 жылы 2 миллиард доллар инвестиция тарту, экспорт көлемін 285 миллион долларға жеткізу және 168 мың адамды жұмыспен қамту бойынша міндеттер белгіленген болатын.
Бұл міндеттемелер кезең-кезеңімен орындалып жатыр. Соңғы алты айда Жызақта өнеркәсіп, қызмет көрсету және ауыл шаруашылығы салаларында 200 жоба іске қосылды. Облысқа 662 миллион доллар көлемінде инвестиция тартылды.
Осындай нәтижелерді арттыру мақсатында Жызақ облысы Зомин ауданында да «Реформалар штабы» құрылды.
Мемлекет басшысы сапары аясында өңірде жүзеге асырылуы жоспарланған жаңа жобалармен танысты.
Атап айтқанда, «бір терезе» қағидасы негізінде ауыл шаруашылығы қызметтерін бір орталыққа шоғырландырған «Агроорталық» құрылды. Өнімділікті арттыруға бағытталған тың тәсілдер аймақтағы азық-түлік сапасына оң әсер етіп, халықтың табысын арттыруға мүмкіндік беріп отыр.
Жызақ облысы картоп шаруашылығын дамытуда тәжірибе алаңына айналып жатыр. Қазіргі таңда Зомин ғылыми тәжірибе станциясында шетелдік және отандық селекцияға жататын 12 сорттың бастапқы тұқым шаруашылығы жолға қойылған.
Картоп тұқымын өсіру әдетте 6–7 жыл мен 8 кезеңді қажет етсе, жаңа ұсыныс бойынша бұл үдеріс 4 кезеңге қысқартылып, 2 жылда дайын болады. Жаңа селекциялық сорттардан алынған 12 тонна жоғары буын «суперэлита» тұқымдары халыққа тегін таратылады. Соның нәтижесінде 120 тонна «элита» картоп тұқымы алынады.
Сондай-ақ бұршақ тұқымдас дақылдар егу, «Зарбдор» ауданындағы канал бойында су сорғы станциялары мен магистральді құбырлар салу жоспарланған.
Жызақтың әртүрлі табиғаты, таулы және шөлді аймақтары жыл бойы туризммен айналысуға мүмкіндік береді. «Зомин» туристік-рекреациялық аймағы, Зомин әуежайы және жаңа жолдар бұл мүмкіндіктерді кеңейтті. 6 ірі канал бойында демалыс аймақтары ұйымдастырылды. Енді «Айдар–Арнасай» көлдер жүйесі жағасында да заманауи туризм орталығы құрылмақ.
– Аудандарға өнеркәсіпті енгізіп, халықты жұмыспен қамтуға тырысып жатырмыз. Бұрын дала болған жерлерде заманауи кәсіпорындар пайда болуда. Халқымыз өз шеберлігі мен үй іргесіндегі жерінен табыс табуда. Бірақ бұл бүгінгі нәтиже ғана. Жаңа ұрпақ өсіп келеді, жастарымыздың білімі мен талабы артып келеді. Олардың жұмыс істеуі мен жақсы өмір сүруі үшін бүгіннен бастап жағдай жасауымыз керек. Егер мүмкіндіктер дұрыс пайдаланылса, Зомин ауданы жұмыспен қамтылған өңірге айнала алады, – деді Шавкат Мирзиёев.
Мәлім болғандай, «Көкдала» ауданының жаңа орталығында өнер сарайы, өнер мектебі, жалпы білім беретін мектеп және спорт кешені қатар салынып жатыр. Мемлекет басшысы бұл балалар үшін қолайлы болатынын айтып, келесі жобаларда осы тәжірибені қолдану қажет екенін атап өткен еді. Осы негізде енді Зомин ауданында да мәдениет сарайы мен өнер мектебі салынады. Мәдениет сарайы 300 орынға есептелген және аудан орталығындағы 45 мыңнан астам тұрғынға қызмет көрсетеді. Бұл жерде «Зомин сайқали» фольклорлық-этнографиялық ансамблі және 13 үйірме жұмыс істейтін болады.
Жауапты тұлғаларға осы жобаларды жүзеге асыру және әлеуметтік-экономикалық салаларды дамыту бойынша тапсырмалар берілді.
Осылайша, Мемлекет басшысының Жызақ облысына жасаған сапары аяқталды.
