Атап айтқанда, биыл 3 сәуірде Жаңа Ташкент қаласында алғашқы нысандардың құрылысы басталған болатын. Мемлекет басшысы бұл ауқымды жоба білім мен мәдениет орталықтарынан басталып жатқанын ерекше атап өтіп, «бұл біздің білімді қоғам құру идеямыздың негізі және үлгісі болады» деген еді.
Олардың бірі – Әлішер Науаи атындағы халықаралық ғылыми-зерттеу орталығы, Әдебиет мұражайы және Ұлттық мақом орталығы кешені. Бұл кешен әлемге әйгілі «Zaha Hadid architects» компаниясы тарапынан жобаланған. Болашақ кешен өзінің ерекше дизайны және функционалдығымен назар аударады. Эстетика мен қолайлылық шебер үйлесіп, табиғатпен үйлесім табады. Осы сипаттамаларының арқасында кешен болашақта халықаралық туризм орталықтарының біріне айналады.
Жаңа Ташкент үшін тағы бір әлеуетті аймақ – Шыршық өзені. Халық пен қонақтарға заманауи жағдай жасау мақсатында оның шамамен 6 шақырымдық бөлігінде демалыс аймағы құрылмақ. Ол үшін өзен жағалаулары ретке келтіріліп, көгалдандырылып, қонақүйлер, ойын-сауық орындары салынады.
Соңғы жылдары Өзбекстанның ЮНЕСКО-мен ынтымақтастығы күшейе түсуде. Бұл беделді ұйымның Бас конференциясының 43-сессиясы 2025 жылы Самарқанд қаласында өтетіні жоспарланған. Өзбекстан Президентінің биылғы 15 наурыздағы жарлығына сәйкес, дайындық жұмыстары басталды.
Таныстырылымда осы бағытта атқарылып жатқан жұмыстар мен жоспарлар туралы ақпарат берілді. Атап айтқанда, Мәдениет және өнерді дамыту қоры, Өзбекстан Республикасының ЮНЕСКО істері жөніндегі Ұлттық комиссиясы және басқа да ұйымдар бірлесіп, Самарқанд қаласындағы мәдени мұра нысандарын қорғау, оларға саяхаттар мен көрмелер ұйымдастыру шаралары қарастырылуда. Қонақүйлер мен іс-шаралар өткізілетін орындарда барлық жағдайлар жасалады. Сессия қатысушыларының келіп-кетуі, мәдени іс-шаралар, көлік және медициналық қызметтер үйлестіріледі.
Әлеуметтік саладағы ең басты бағыттардың бірі – білім беру. Халқының көпшілігі жастардан тұратын елімізде білім берудің барлық деңгейлері жүйелі түрде дамытылуда. Атап айтқанда, жоғары білім саласында да жаңа мекемелер салынып, жағдайлар жақсартылуда.
Бұхара мемлекеттік университетінде 21 мыңнан астам студент оқиды, 10 факультет, 8 жатақхана бар. Алайда ғимараттар қаланың әртүрлі аймақтарында шашыраңқы орналасқандықтан, оқытушылар мен студенттерге ыңғайсыздықтар туғызуда.
Сондықтан Бұхара қаласының шетінде университетке арналған жаңа кампус салу жоспарлануда. 43 гектар аумақта жобаланған кешенде барлық факультеттер, әкімшілік, жатақханалар, зертханалар, кітапхана, стадион, спорт залы және амфитеатр бір жерде орналасатын болады. Оқу және тәжірибе үшін заманауи жағдайлар жасалады. Жатақхана сыйымдылығы 3 мыңнан 6 мыңға дейін ұлғайтылады. Бос жерлерге ағаштар отырғызылып, бақшаға айналады.
Хиуа қаласы – еліміздің туристік орындарының бірі. Соңғы жылдардағы құрылыс жұмыстарының нәтижесінде оның әлеуеті одан әрі артты. Мұнда келушілерге ыңғайлы болу үшін теміржол вокзалының жанында жол өткелі салу жоспарланған. Жобаның мақсатына сәйкес, 450 метрлік бұл жол көлік қозғалысын бөлек ұйымдастыруға мүмкіндік береді, вокзал мен «Ичан Қала» арасында жаяу жүргіншілер қауіпсіз жүреді.
Мемлекет басшысы жобаларды жетілдіру және қолданыстағы жұмыстардың сапасын арттыру жөнінде тапсырмалар берді.
Таныстырылымда Ташкент қаласындағы инвестициялық бағдарламалардың орындалуы туралы да ақпарат берілді. Атап өткендей, биылғы жылдың өткен кезеңінде 2 миллиард доллар көлеміндегі инвестициялар игерілген. 200-ге жуық өнеркәсіп жобалары іске қосылып, 25 мыңнан астам жұмыс орны ашылған. Атап айтқанда, «Янгихаёт» ауданындағы технопаркте 46 кәсіпорын құрылуда.
Президент жыл соңына дейін жоспарланған жобаларды уақытылы іске қосып, энергия үнемдеуге ерекше назар аудару қажет екенін атап өтті.
