Аталған жоба биыл ақпан айында басталып, жалпы ұзындығы 55 шақырымды құрайды. Жобаның аясында екі вокзал, «Үргіт» экономикалық аймағында екі жүк станциясы және бірқатар көпірлер салынды. Алдағы кезеңде желіні толық электрлендіру жоспарланып отыр.
Жаңа бағыт екі жұп қалааралық пойыз және тоғыз жұп жүк пойызының қатынасын қамтамасыз етеді. Жобаны биылғы жылдың соңына дейін аяқтау көзделген. Пойыздар іске қосылған соң жылына 359 мың жолаушы мен 8,2 миллион тонна жүк тасымалдауға мүмкіндік туады.
Бұл бағыт Самарқанд қаласы мен «Жомбой», «Пастдарғом», «Тойлоқ» және «Үргіт» аудандары тұрғындары үшін қауіпсіз әрі заманауи көлік қызметін ұсынумен маңызды. Сонымен қатар, жаңа теміржол ішкі туризмнің дамуына да серпін береді.
Теміржол инфрақұрылымы экономиканың маңызды салаларының бірі болғандықтан, жоба «Үргіт» еркін экономикалық аймағының әлеуетін арттыруға да ықпал етеді. Жаңа бағыт іске қосылғанда 130 жаңа жұмыс орны ашылады.
Мемлекет басшысы сапар барысында қоғам өкілдерімен бірге осы бағытта қатынайтын пойызбен «Үргіт» ауданына барды.
Сапар кезінде Президент теміржол инфрақұрылымын дамыту, жолаушылар үшін қолайлылықты арттыру, желіні электрлендіру және жол бойын абаттандыру жөнінде қосымша тапсырмалар берді. Сонымен қатар, құрылыс пен абаттандыру жұмыстарын қадағалап, олардың сапасына ерекше мән берді.
«Үргіт» ауданы өңірдің маңызды әлеуетіне ие. Мұнда халық іскер, кәсіпкерлік рухы жоғары. Өзбекстан экономикасы үшін стратегиялық маңызы бар мұндай өңірлерді дамытуда заманауи логистика мен инфрақұрылым шешуші фактор саналады.
Жаңа теміржол желісі ауданның экономикалық өсуін тежеп тұрған кедергілер мен логистикалық «тромбтар» жойып, жүк тасымалының жылдамдығын арттырады, өнімдерді нарыққа уақтылы жеткізуге мүмкіндік береді, инвесторлар үшін тартымдылық тудырады және өңірдің бәсекеге қабілеттілігін күшейтеді.
Ең бастысы, бұл жобалар халықтың тұрмыс деңгейіне тікелей әсер етеді. Инфрақұрылым дамыған жерде жұмыс орындары көбейіп, қызмет көрсету сапасы жақсарып, кәсіпкерлік белсенділік артады.
Жоба теміржол желісін жаңғырту және кеңейтуге бағытталған жұмыстардың маңызды бөлігі болып саналады. Бұл үдерісте жұмысты уақытында әрі жоғары сапада орындау, цифрлық технологияларды кеңінен енгізу және шығындарды оңтайландыру қажеттігі айтылды.
Сапар кезіндегі сұхбат барысында Мемлекет басшысы Самарқандта жүріп жатқан әлеуметтік-экономикалық жаңарулардың халық өміріндегі оң өзгерістер ретінде айқын сезіліп жатқаны, жастарды отаншылдық рухында, Жаңа Өзбекстанды құрушылар ретінде тәрбиелеу жөнінде сөз қозғады. Үргітке дейін тартылған теміржолға жапсарлас жатқан жерлерді игеру, ол аумақтарда ауыл шаруашылығы мәдениетін көтеру, білім беру саласында, соның ішінде көрші мемлекеттермен халықаралық ынтымақтастықты нығайту қажеттігі айтылды.
«Үргіт» вокзалы жаңа бағыттың негізгі нүктесі болып табылады. Президент вокзал инфрақұрылымы, қызмет көрсету жүйесі мен жолаушылар қозғалысын ұйымдастыруға ерекше мән берді. Туристер үшін қолайлылықты арттыру маңызды екені айтылды.
Мемлекет басшысы осында «Үргіт» ауданының белсенділерімен сұхбат өткізді. Әңгіме барысында өңірлердегі өзгерістер, халықтың тұрмыс салты және тыныштықтың қадірі туралы пікір алмасылды.
Адамдардың тұрмысын жақсарту, табыс пен әл-ауқатты арттыру, махаллаларды абаттандыру мемлекеттік саясаттың басым бағыттары ретінде белгіленгені атап өтілді. Экономикадағы құрылымдық өзгерістердің арқасында өнеркәсіп, ауыл шаруашылығы, туризм, көлік және энергетика салаларында ірі жобалар жүзеге асырылып жатқаны айтылды.
Ақсақалдар бұл жаңалықтардың халық өміріне нақты оң әсер етіп жатқанын және реформаларға қоғамның жоғары баға беріп отырғанын жеткізді.
Сондай-ақ, Мемлекет басшысы вокзал маңында халық әл-ауқатын және өңірдің экономикалық тартымдылығын арттыруға бағытталған қосымша жобалармен де танысты. Кәсіпкерлер бастамасы негізінде автовокзал, ұлттық шайхана, экобазар, тұрғын үй кешендері, жеке мектеп және балабақшалар салу жоспарланып отыр.
Осынау жобалар іске қосылған соң тұрғындарға жаңа қызмет түрлері ұсынылады, өңірдің әлеуметтік инфрақұрылымы дамып, кәсіпкерлікте белсенділік артады. Ең бастысы, шамамен 350 адам тұрақты жұмыспен қамтылып, өңірдің экономикалық өсуіне айтарлықтай серпін беріледі.
