Жыл соңына дейін Сырдария облысындағы 6 медициналық мекемесін қамтитын «Гүлістан медициналық кластері» толық іске қосылады.
Бұл кластерге шет мемлекеттердің ең озық клиникалары серіктес ретінде тартылады, сондай-ақ күрделі әрі жоғары технологиялық хирургиялық операциялар жасау жолға қойылады.
Сондай-ақ, елімізде алғаш рет құрылып жатқан осы кластерді және басқа да медициналық мекемелерді заманалық кадрлармен қамтамасыз ету мақсатында Гүлістан медициналық колледжі негізінде Түркияның «Денсаулық білімдері университетінің» филиалы құрылады.
Филиалға қабылданған студенттер Өзбекстанда 3 жыл, Түркияда 3 жыл оқиды. Студенттердің 30 пайызы грант негізінде оқиды. Оқыту істері күндізгі білім формасында, мемлекеттік және ағылшын тілдерінде жүзеге асырылады.
Түркиялық қонақтар Сырдария облысының әкімі Ғафуржон Мирзаевпен кездесіп, алдағы уақытта атқарылатын жұмыстар, университеттің филиалын ашу және оны іске қосу жөнінде пікір алмасты, деп хабарлайды Сырдария облыстық денсаулық сақтау басқармасының баспасөз қызметі.
Мәлімет үшін: Түркияның «Денсаулық білімдері университетінің» филиалын ашу, оны Сырдарияда іске түсіру мәселесі «Жаңа Өзбекстанның 2022-2026 жылдарға арналған даму стратегиясын 2022 жылы жүзеге асыру бойынша “Жол картасында” да көрсетілген. Бұл университет Түркиядағы ең беделді медициналық университеттердің бірі болып табылады. Қазіргі уақытта университетте 13 факультет, 5 институт, 6 кәсіби медициналық мектеп, 35-ке жуық ғылыми орталық және 58 аурухана бар.
