Өзбекстандағы халық саны 37 миллионнан асты. Биылдың өзінде 215 мың отбасы пайда болды. Әрине, мұның бәрі тұрғын үйге сұранысты арттырады.

Биыл 100 мың пәтерлі көпқабатты үйлер пайдалануға беріледі. Алдағы жылы 120 мың пәтер салу жоспарланған.

Сонымен бірге сұраныстың көптігін пайдаланып, бұл салада әділетсіз бизнес жасап жүргендер де бар. Төлем жүйесінің реттелмеуі, цифрландыру мен ашықтықтың болмауы осыған жол ашуда. Жаңа үйлерді сатып алғысы келетін азаматтар қаражатын банк арқылы емес, тікелей құрылысшыға беруде, бұл қаржының «көлеңкеде» қалуына себеп болып отыр. Көп жағдайда үйлерді тапсыру мерзімі кешіктіріліп, тұрғындардың ақшасы «мұздап» қалуда. Үлескерлік келісімшарттар еш жерде тіркелмей, тек құрылысшының мүддесіне қызмет етуде.

Сол себепті Президент 23 қыркүйекте құрылыс индустриясы бойынша өткен жиында тұрғын үй сатып алуда халықтың қаражатын кепілдендіретін жүйе құруды тапсырған болатын. Ұсынылған жобада осы мәселелер бойынша ұсыныстар қаралды.

Атап айтқанда, шет мемлекеттерде «escrow» жүйесі сынақтан өткен. Бұл жүйе бойынша тапсырыс беруші мен коммерциялық банк арасында жасалған келісім негізінде әрбір құрылыс нысаны үшін «escrow» шоты ашылады. Жылжымайтын мүлікке келісілген қаражат осы шот арқылы жүзеге асырылады. Шотқа жиналған қаражат негізінде коммерциялық банктер тапсырыс берушіге төмендетілген пайызбен несие береді. Құрылыс аяқталғаннан кейін сатып алушының шотындағы ақша құрылыс жүргізуші ұйымға аударылады. Егер құрылысшы өз міндеттемесін орындамаса, бұл қаржы иесіне қайтарылады. «Escrow» шотындағы қаражатқа ешқандай талап қоюға жол берілмейді.

Президент ұсыныстарды қолдап, осы бағытта құқықтық негіз құру және бұл жүйені құрылысқа қатысы бар министрліктер мен мекемелерге интеграциялау бойынша тапсырмалар берді.