“Эрон ҳукумати кемани ва унинг экипажини зудлик билан қўйиб юбориши керак”, деди у.
Давлат департаменти вакилининг сўзларига кўра, бу тижорат кемасини ноқонуний олиб қўйишдир. Теҳрон томонидан қўллаб-қувватланаётган бундай ҳаракатлар халқаро савдони бузишга қаратилган, дея қўшимча қилди у.
Аввалроқ ҳарбий кийимдаги эркаклар чиқиб олган St. Nikolas танкери пайшанба куни Уммон қирғоқлари яқинида йўналишини ўзгартириб, Эронга йўл олган. Кейинроқ Эрон ҳарбий-денгиз кучлари қўмондонлиги кема қўлга олинганини тасдиқлади.
Грециянинг Empire Navigation юк ташиш компаниясига тегишли танкер Ироқ нефтини олиб кетаётган бўлиб, Басрадан (Ироқ) Сувайш канали орқали Туркияга йўл олган. Кема Туркиянинг Tupras компанияси томонидан ижарага олинган. Шунга қарамай, Эрон томони танкерни “американики” деб ҳисоблайди.
Танкер аввалроқ Suez Rajan деб аталган. АҚШга кўра, у Эрон нефтини АҚШ санкцияларини бузган ҳолда ташиган. АҚШ Адлия вазирлиги ва компания эгаси ўртасидаги келишмовчилик 2023 йилда мусодара қилинган 1 миллион баррель Эрон нефтини АҚШга жўнатиш йўли билан ҳал қилинган, деб хабар беради korrespondent.net.
