Яқин-яқингача юртимизда елка бўғимлари касалликларини фақат консерватив йўл билан даволаш имкони мавжуд эди. Юқори технологик муолажалар талаб этилган ҳолатларда эса беморлар хорижда, асосан Ҳиндистонда операция қилинган.
Эндиликда бундай ноёб жарроҳлик амалиётлари ўзимизда ҳам ўтказиляпти. Хусусан, Республика ихтисослаштирилган травматология ва ортопедия илмий-амалий тиббиёт марказида елка бўғимлари касалликлари елка артроскопияси каби юқори технологик операциялар ёрдамида самарали даволанмоқда.
Куни кеча мазкур муассасада шу каби мураккаб амалиётларнинг навбатдагиси ўтказилди. Бу галги операциянинг ўзига хослиги шундаки, жиддий ортопедик хасталикка чалинган беморда бир пайтнинг ўзида артроскопия ва елка-бўғимнинг турли тузилмалари шикастланишида тиклаш пластикаси бажарилди.
— Авваллари юртимизда артроскопик йўл билан фақат каминвазив жарроҳлик амалиётлари ўтказилган, — дейди марказ шифокори Санжар Қодиров. — Эндиликда бундай операциялар йирик бўғимларда реконструктив ҳамда пластик муолажалар ўтказиш имконини бераётир.
Қолаверса, бугунги операцияда илгари қўлланилмаган баъзи усуллар амалиётга киритилди. Энг муҳими, кам инвазив йўл билан бажарилган муолажадан сўнг бемор аввалгидек одатий ҳаётга қайтиб, ҳатто, спорт билан шуғулланиши мумкин.
Маълумот ўрнида айтиш лозимки, ўтган 2022 йил Республика ихтисослаштирилган травматология ва ортопедия илмий-амалий тиббиёт марказида елка бўғимлари касалликлари ва жароҳатлари бўйича 25 ўринли артроскопия бўлими фаолияти йўлга қўйилган эди.
Яқин келажакда бу ерда чаноқ-сон, ошиқ-болдир, тирсак ҳамда кафт бўғимларида ҳам артроскопик йўл билан бундай ноёб опреацияларни бажариш режалаштирилган.
