Бу ҳақда марказнинг Жамоатчилик билан алоқалар хизмати маълум қилишича, Президент Шавкат Мирзиёевнинг тадбиркорлар билан иккинчи очиқ мулоқотида ишбилармон доира вакилларидан келиб тушган 12 мингдан ортиқ долзарб муаммо, уларни ҳал этиш йўллари, мамлакатимизда ишбилармонлик муҳитини яхшилаш бўйича таклиф ва ташаббуслар муҳокама қилинди.
Ушбу мурожаатларнинг асосийларини қуйидагилар ташкил қилади:
Биринчидан – янги лойиҳаларни бошлаш, бизнесни кенгайтириш ва айланма маблағларни кўпайтириш учун тадбиркорларда 6 миллиард доллар қўшимча кредитларга эҳтиёж мавжуд. Тадбиркорлардан шу масалага оид 3 мингга яқин мурожаат келиб тушган.
Иккинчидан – 1,5 минг тадбиркор солиқ маъмуриятчилигининг мураккаблиги ва текширувлар бўйича ўз эътирозини билдирган.
Учинчидан – тадбиркорлик учун шароитлар барча туман ва шаҳарларда ҳам бир хил эмас. Буни яқинда жорий этилган ҳудудларнинг инвестициявий рейтинги яққол кўрсатиб берди. Барча туман ва шаҳарларда тадбиркорликни тенг ривожлантириш бўйича ҳар бир ҳудуд учун алоҳида ёндашувлар зарурлиги қайд этилди.
Тўртинчидан – инфратузилмага уланиш, ер ва жой ажратиш масалалари бўйича бизнес вакилларининг кўплаб муаммолари ҳал этилмасдан тургани борасида ҳам 2 мингдан ортиқ мурожаат келиб тушган.
Бешинчидан – мулк дахлсизлиги, тадбиркорлик фаолиятига аралашиш ҳам бизнес вакилларини жиддий ташвишга солаётгани мурожаатларда акс этган.
Олтинчидан – мурожаатларда кичик ва ўрта бизнес тушунчалари, уларнинг ўсишига туртки берувчи алоҳида қўллаб-қувватлаш чоралари белгиланмагани келтирилган.
Мана шундай мурожаатлардан келиб чиқиб, давлатимиз раҳбари соҳа вакилларини қўллаб-қувватлаш юзасидан 5 та йўналишда ташаббусларни билдирди.
Президент нутқининг лингвистик таҳлил натижалари давлат раҳбари нимага кўпроқ эътибор қаратаётганини очиқлайди. Хусусан, давлатимиз раҳбари нутқини таҳлили қилиш тадбиркорларнинг энг долзарб муаммолари солиқлар ва кредитлар эканини кўрсатди.
Президент томонидан энг кўп тилга олинган сўзлар "тадбиркор", "бизнес", "солиқ", "банк" ва "кредитлар" бўлди.
Жумладан, “тадбиркор” сўзи 86 марта, "бизнес" сўзи 43 марта, "солиқ" сўзи 40 марта, "банк" ва у билан боғлиқ сўзлар 21 марта айтилган.
