Хусусан, соғлиқни сақлаш тизимига қаратилган эътибор, айнан, болалар саломатлигини сақлаш соҳасини ривожлантириш йўлидаги амалий чора тадбирларга кўра, даволаш қийин бўлган юрак хасталиклари билан оғриган болаларнинг ҳам саломатлиги тикланяпти.
Бугунги кунда юқори тиббий технологиялар асосида юртимиздаги ўнта тиббиёт муассасасида болалар кардиожарроҳлиги операциялари ўтказилмоқда.
Рақамларга эътибор берсак соҳа қанчалик тараққий этаётганини англаш қийин эмас. Жумладан, 2016 йил 1 минг 447 та кардиожарроҳлик амалиёти амалга оширилган бўлса, 2019 йил 2 минг 285 та, 2020 йил эса 2 минг 315 та ана шундай мураккаб амалиётлар муваффақиятли ўтказилган.
Нейросенсор кар ёки заиф эшитадиган болаларда кохлеар имплантатлардан фойдаланган ҳолда операциялар ўтказиш бўйича 2016 йилда фақатгина 150 нафар бола қамраб олинган бўлса, 2018 йилдан 239 нафар, 2019 йил 320 нафар, ўтган йил эса 225 нафар заиф эшитадиган бемор болаларда операция амалга оширилди.
Давлат дастурига биноан эса жорий йил ҳам яна 200 нафардан ортиқ беморларда ҳам айни шундай жарроҳлик амалиёти ўтказилиши режалаштирилган.
Бир сўз билан айтганда, йилдан-йилга энг мураккаб жарроҳлик амалиётларини юртимизда амалга ошириш имкони ва салмоғи ортиб бормоқда. Бу эса аҳолини ўз фарзандларини даволатиш учун катта маблағ сарфлаб, хорижий мамлакатларда сарсон саргардон бўлишини олдини олмоқда. Шунингдек, бу мамлакатимиз соғлиқни сақлаш тизими тараққий этишида муҳим аҳамият касб этмоқда, дея хабар бермоқда Соғлиқни сақлаш вазирлиги Матбуот хизмати.
