Хоразм вилояти божхона бошқармаси “Урганч аэропорти” чегара божхона пости ходимлари ноёб тарихий ва маданий бойликларнинг республикадан олиб чиқишга бўлган уринишни фош этишди. Бу ҳақда Хоразм вилояти божхона бошқармаси Ахборот хизмати хабар берди.
Мазкур божхона пости орқали Туркия давлатга йўл олган фуқаро М.М.нинг қўл юки белгиланган тартибда божхона кўригидан ўтказилганда, назорат-рентген аппаратида шубҳали тасвирлар акс этди. Шундан сўнг, ушбу қўл сумкаси холислар иштирокида ва белгиланган тартибда очиб кўздан кечирилди.
Натижада, божхона назоратидан яширилган, йўловчи божхона декларациясида кўрсатилмаган ва оғзаки сўровда маълум қилинмаган, Ўзбекистон Республикасидан олиб чиқиш таъқиқланган қадимий ҳисобланган сариқ металлдан ясалган 1 дона қумғон ва 2 дона чойнаклар борлиги аниқланди.
Ўтказилган бадиий экспертиза хулосасига кўра, мисдан ясалган қумғон XX асрнинг I ярмида Хивалик усталар томонидан ишланганлиги ҳамда 2 дона чойнак эса XX асрнинг I ярмида Европа давлатларида ишлаб чиқарилганлиги маълум бўлди. Ҳозирги кунда мазкур маданий бойликлар “Ичан-қалъа” Давлат музей қўриқхонасига топширилди.
