Гап шундаки, Олмалиқ кон-металлургия комбинати раҳбарияти ташаббуси ҳамда комбинат олимлари, мутахассисларининг узоқ йиллик изланишлари, илмий тадқиқотлари туфайли платина ишлаб чиқариш технологияси учун муаллифлик ҳуқуқи қўлга киритилди.
“Мамлакатимиз иқтисодиётига мис ишлаб чиқариш йўли билан таянч бўлиб келаётган ОКМКда нафақат мис, олтин, кумуш, балки бошқа ноёб – палладий, рений каби металлар ҳам ишлаб чиқаришга эришилмоқда. Эндиликда ушбу маҳсулотлар қаторига платина ҳам қўшилди” дейилади ОКМК ахборот хизмати хабарида.
Платина ўзи қандай металл? Заргарлар орасида “Рангли металлар маликаси” дея ном қозонган ушбу нодир металл нисбий зичлиги юқори, оловга бардошли, қаттиқ ҳамда ўта эгилувчанлиги билан саноатда, хусусан, автомобилсозликда ва заргарлар орасида қадрланади. Дунёда 5 та йирик платина ишлаб чиқарувчи давлат мавжуд. Энди улар қаторига Ўзбекистон ҳам қўшилмоқда. Бугунги кунда ОКМК 7 та маҳсулот ишлаб чиқариш технологиясига оид муаллифлик ҳуқиқини қўлга киритган. Келажакда комбинат нодир ва қимматбаҳо металларни ажратиб олиш бўйича ўз олдига улкан режаларни белгилаб қўйган.
Бугун дунё бозорида 1 грамми 28 долларга баҳоланаётган платина ишлаб чиқариш саноати йилдан йилга такомиллашиб бормоқда. Қўрғошиндан 2 баробар зич ҳисобланган ушбу ноёб металл, ўтга чидамлилиги, электр ўтказувчанлиги, зангламаслиги туфайли космос саноатида, тиббиётда, электротехникада, шишасозлик саноатида, самолёт ва кемасозликда, кимё ва автомобилсозлик саноатларида кенг қўлланилади. Бу фактлар кўплаб соҳаларнинг равнақи демакдир. Юртимизда, хусусан, Олмалиқ кон-металлургия комбинатида платина ишлаб чиқариш технологиясининг йўлга қўйилиши мамлакатимиз иқтисодий ишлаб чиқариш салоҳиятига ўзининг ижобий таъсирини кўрсатиши, шубҳасиз.
