Агентлик маълумотларига кўра, профессор Сяо Лун бошчилигидаги тадқиқотчилар гуруҳи Хитойнинг “Чжужун” марсоходининг мультиспектрал камераси томонидан олинган маълумотларни таҳлил қилиб, биринчи марта “Марс юзасида денгиз чўкиндиларининг петрологик далилларини” топди.
Агентликнинг таъкидлашича, аввалги тадқиқотларда Марсда катта миқдорда суюқлик белгилари аниқланган, бироқ бу даъволар жойида таҳлил қилинмаганлиги сабабли мунозарали бўлиб қолганди.
Аввалги кузатувлар шуни кўрсатдики, Марс 3,7 миллиард йил ичида ўз юзасини 140 метрлик океан билан қоплаш учун етарли миқдордаги сувни йўқотган. Баъзи олимларнинг фикрига кўра, бу сувнинг катта қисми коинотга буғланиб кетмаган бўлиши, ҳали ҳам Марснинг ички қисмида, саёз чуқурликларида мавжуд бўлиши мумкин.
2020 йил 23 июль куни Хайнань оролидаги Вэньчан космодромидан Марсни тадқиқ қилишга мўлжалланган орбитал модул, қўниш капсуласи ва марсоходдан иборат бўлган Хитойнинг биринчи “Тяньвэнь-1” космик кемаси учирилган. 2021 йил 15 май куни “Тяньвэнь-1” таркибидаги “Чжужун” марсоходи Марс юзасидаги Утопия текислигининг жанубий қисмига муваффақиятли қўнди. Миссия Марсда ҳаётнинг бўлиши мумкин бўлган белгиларини топишга қаратилган эди. Хитой бир миссияда Марсга учиш, қўниш ва Қизил сайёрани тадқиқ қилишни амалга оширган дунёдаги биринчи давлат айланди, деб хабар беради ria.ru.
