Сарвари давлат бо корҳои созандагие, ки дар ин ҷо амалӣ шуда истодаанд, шинос шуд.
Муҳаддиси бузург дар тамоми ҷаҳони ислом эҳтироми амиқ дорад ва ҳазорҳо одамон орзу доранд, ки мақбараи ӯро бубинанд. Бо мақсади фароҳам овардани шароити васеътар барои зиёраткунандагон дар ин ҷо маҷмааи бузурги меъморӣ бунёд мегардад.
Масоҳати ин макони муқаддас то 44 гектар васеъ карда шуд. Мақбара, масҷид барои 10 ҳазор нафар ва бинои маъмурӣ сохта шуданд. Чор манора бо баландии 75 метр ба ансамбл бузургиву шаҳомат бахшиданд.
Айни замон корҳои ороишӣ идома доранд. Дар порталҳо ва деворҳои айвонҳо бо хаттотӣ ҳадисҳо аз «Саҳеҳи Бухорӣ» нақш карда мешаванд.
Президент таъкид намуд, ки ин маҷмаа бояд на танҳо макони ибодат, балки маркази илм, маърифат, тарбия ва намунаи ахлоқӣ гардад. Зикр гардид, ки осори гаронбаҳо, дониш ва сифати инсонӣ ва маънавии Имоми Бухорӣ барои ҳама, бахусус ҷавонон, намунаи олӣ мебошанд.
Бо ҳамин мақсад дар маҷмааи нав Осорхонаи инноватсионӣ низ таъсис дода мешавад. Он зиндагӣ ва мероси илмии Имоми Бухорӣ, ки дар ҷаҳони ислом бо унвони «султони муҳаддисон» эътироф шудааст, инчунин саҳми ӯро дар рушди маърифати исломӣ намоиш медиҳад. Ҳамчунин, дар осорхона маълумот дар бораи таърихи 25 паёмбаре, ки номашон дар Қуръони карим зикр шудааст, шаҷараи Паёмбари акрам Муҳаммад (с), ҳаёти эшон дар Макка ва Мадина, ҷамъоварӣ ва сабти ҳадисҳо ҷой дода мешавад.
Дар гирду атрофи маҷмаа сохтмони меҳмонхона ва дигар биноҳои хидматрасонӣ ба зиёраткунандагон ба марҳилаи ниҳоӣ расидаанд.
Сарвари давлат супориш дод, ки корҳои сохтмонӣ бо сифати баланд иҷро шаванд, барои мардум шароити мусоид бештар фароҳам оварда шавад ва шумораи майдонҳои сабз дар атрофи маҷмаа зиёд гардонда шавад.
