Нурмат Отабеков дар бораи паҳншавии штамм нави коронавирус бо номи "омикрон" дар ҷаҳон изҳори назар кард. Хабарро хидмати матбуоти Вазорати тандурустӣ чоп кардааст.
Инак, аз суханони Н.Отабеков бармеояд, ки вирусҳо организмҳои оддию беҳуҷайра буда, тағйирпазирии онҳо табиист. То имрӯз дар ангезандаи коронавирус беш аз ҳафт ҳазор штамми мутатсияшуда муайян карда шудааст. Штамми нав яке аз онҳост.
Мутахассис қайд мекунад: бо мурури замон шояд барои штамми нав протоколи алоҳида таҳия карда шавад. Ба ақидаи ӯ, истифодаи муассир аз имконоти мавҷудаи ташхисӣ, табобатӣ ва профилактикӣ дар мубориза бо ин навъи вирус натиҷа медиҳад.
Муовини раиси ХСЭ ҳамчунин ёдовар шуд, ки чораҳои пешгирикунанда вобаста ба карантин то ҳол лағв нашудаанд ва шаҳрвандонро ба риояи фаъолонаи онҳо даъват кард. Айни замон зарур аст, ки вазъи муътадили эпидемиологиро, аз ҷумла тавассути ташаккули иммунитети ҷамоавӣ, яъне баланд бардоштани сатҳи эмгузаронӣ нигоҳ дошт.
