Самимона шодам, ки шуморо дар замини бостонӣ ва зебои Ӯзбекистон хайрамақдам мегӯям.
Миннатдории амиқи худро ба Маркази байналмилалии Низомии Ганҷавӣ баён мекунам, ки ташаббус нишон дода, дар як майдони Тошканд чунин ҳайати пурнуфуз – сиёсатмадорон ва арбобони давлатӣ, роҳбарони созмонҳои байналмилалиро, ки онҳо саҳми бузург дар рушди кишварҳои худ, таҳкими ҳамкориҳои байналмилалӣ ва эътимоди мутақобила мегузоранд, гирд овардааст.
Мехоҳам нақши муҳими ин марказро дар ҳифз ва густариши васеи мероси беназири эҷодии мутафаккири бузурги озарбойҷонӣ Низомии Ганҷавӣ – «султони шоирон», ки шоири бузурги ӯзбек Алишер Навоӣ ӯро чунин номидааст, махсус таъкид намоям.
Қайд менамоям, ки ҳикмати амиқ, ғояҳои Низомии Ганҷавӣ дар бораи ҳамоҳангии инсон бо олами атроф ва адолат, ки ҳамеша муҳиманд, дар шароити душвори имрӯза боз ҳам бештар арзиш пайдо мекунанд.
Иштироки фаъоли Маркази Низомии Ганҷавӣ дар омӯзиши масъалаҳои рӯзномаи байналмилалӣ сазовори таваҷҷуҳи алоҳида аст.
Форуми байналмилалии Боку, ки ҳамасола таҳти сарпарастии он баргузор мешавад, ба яке аз майдонҳои эътиборманду бонуфузи муколама дар ҷаҳон табдил ёфтааст, ки дар он ғояҳои нав барои ҳалли муҳимтарин мушкилоти рушди байналмилалӣ ва минтақавӣ пешниҳод мегарданд.
Бисёр муҳим мешуморам, ки мавзӯи асосии форуми имрӯза масъалаҳои пайванди Осиёи Марказӣ ва Қафқози Ҷанубӣ ва дурнамои ҳамкории ин ду минтақаи бузург бо Аврупо муайян шудааст.
Мо дар ин имконияти нодирро мебинем, ки ба ҷаҳон Осиёи Марказиро, ки раванди ҳамгироӣ ва ҳамкорӣ дар он босуръат рушд меёбанд, васеъ муаррифӣ намоем, инчунин дар бораи таҳкими пайванди байниминтақавӣ, ҳамчунин истифодаи пурраи имкониятҳои Ӯзбекистон ва Озарбойҷон мубодилаи назар кунем.
Дар солҳои охир муносибатҳои Ӯзбекистону Озарбойҷон дар рӯҳияи эътимод ва дастгирии мутақобила фаъолона рушд доранд, Созишномаи муносибатҳои ҳампаймонӣ ба имзо расидааст, Шӯрои олии байнидавлатӣ фаъолият дорад.
Мехоҳам таъкид намоям, ки Озарбойҷон ҳамчун пули стратегӣ миёни Осиёи Марказӣ ва Аврупо амал мекунад.
Имрӯз муносибатҳои мо бо Аврупо, ки дар ин форум бо иштироки густарда муаррифӣ шудааст, ба марҳилаи комилан нав ворид гардидаанд.
Ба қарибӣ мо бори аввал дар кишварамон саммити «Осиёи Марказӣ – Иттиҳоди Аврупо»-ро баргузор кардем.
Қарори таърихӣ дар бораи барқарор намудани шарикии стратегӣ байни минтақаи мо ва кишварҳои Иттиҳоди Аврупо қабул шуд. Мо ният дорем дар моҳҳои наздик Созишномаи шарикии васеъ ва ҳамкориро бо Иттиҳоди Аврупо ба имзо расонем.
Мо якҷо бо Иттиҳоди Аврупо ва дигар шарикон корҳои мақсаднокро барои рушди роҳҳои муассири нақлиётӣ-логистикӣ ва энергетикӣ идома медиҳем. Бовар дорам, ки ин тадбирҳо имкон медиҳанд нақши минтақаи моро ҳамчун хаб миёни Ғарб ва Шарқ эҳё намоем.
Мо омодагии Президенти Озарбойҷон, ҷаноби муҳтарам Илҳом Гейдарович Алиевро дар рушди раванди нави минтақавӣ ва талошҳои ӯро барои таҳкими ҳамкорӣ миёни Қафқози Ҷанубӣ ва Осиёи Марказӣ баланд арзёбӣ менамоем.
Аз фурсат истифода бурда, бори дигар халқи дӯстонаи Озарбойҷонро бо дастоварди бузурги таърихӣ – имзои изҳороти сеҷонибаи муштарак бо Арманистон дар Вашингтон бо миёнравии ИМА самимона табрик мегӯем.
Муҳтарам иштирокчиёни форум!
Имрӯз Ӯзбекистон бо қатъият ислоҳоти динамикиро идома медиҳад ва дар ин роҳ мо ба дастовардҳои бузург ноил гардидем. Дар ҳаёти мо тамоюли «Ӯзбекистон – кишваре, ки ба рӯи ҷаҳон кушода аст ва ҷаҳонро ба рӯи худ мекушояд» устувор ҷой гирифтааст.
Мо муносибатҳои дарозмуддатро бо шарикони хориҷӣ ва созмонҳои байналмилалӣ пайваста таҳким мебахшем, ҷанбаҳои нави ҳамкориро васеъ месозем, ҳамеша барои ғояҳои нав ва пешрафта боз ҳастем. Мо сиёсати бунёди Ӯзбекистони Навро ҳамчун як давлати ҳуқуқбунёд, дунявӣ, демократӣ ва иҷтимоӣ идома медиҳем.
Дар шароити ниҳоят душвори имрӯз Ӯзбекистон ва минтақаи Осиёи Марказӣ ба ҷомеаи байналмилалӣ сарвати гаронбаҳо – субот, эътимод ва рушдро пешниҳод менамоянд.
Бовар дорам, ки имрӯз, дар шароити нав, барои мо уфуқҳои васеъ барои ҳамкорӣ боз шудаанд ва имкониятҳои нав барои кори муштарак дар самтҳои манфиатбахш ва судманди дуҷониба фароҳам меоянд. Аз ин рӯ, ба дастгирии шумо ва ҳамкориҳои минбаъда умед дорем.
Ба ҳамаи иштирокчиёни мулоқоти имрӯзаи мо муколамаи самаранок ва кори бобарори форумро самимона таманно дорам.
Шавкат Мирзиёев,
Президенти Ҷумҳурии Ӯзбекистон
