Раиси Комиссияи марказии интихобот Зайниддин Низомхоҷаев қайд кард, ки раъйпурсии дирӯз зуҳури равшани тафаккури баланд ва хирадмандии мардуми мост.

Дар раъйпурсӣ оид ба лоиҳаи Қонуни конститутсионӣ аз 19 миллиону 722 ҳазору 809 нафар интихобкунандагоне, ки ба рӯйхатҳо шомил шудаанд, 16 миллиону 673 ҳазору 189 нафарашон, аз ҷумла ҳамватаноне, ки дар хориҷ овоз додаанд, иштирок карданд. Ин 84,54 фоизи шумораи умумии интихобкунандагонро ташкил медиҳад. Аз 19 то 26 апрели соли ҷорӣ 611 ҳазору 320 нафар интихобкунандагон аз фурсат истифода карда, барвақт овоз доданд. Аз ҷумла, ҳамватанони бурунмарзии мо аз ин фурсат истифода карданд, ки дар 39 кишвари ҷаҳон 55 макони баргузории раъйпурсӣ таъсис дода шуд.

Тибқи маълумоти пешакӣ, ба суол дар бюллетени раъйпурсӣ «Оё Қонуни конститутсионии Ҷумҳурии Ӯзбекистон «Дар бораи Конститутсияи Ҷумҳурии Ӯзбекистон»-ро қабул мекунед?» – 15 миллиону 40 ҳазору 55 (90,21%) овоздиҳандагон ҷавоби «Ҳа» додаанд, 1 миллиону 559 ҳазору 200 нафар (9,35%) сутуни «Не»-ро пур карданд, 73 ҳазору 934 (0,49%) бюллетен беэътибор дониста шуд.

«Тибқи қонунгузорӣ, раъйпурсӣ дар сурате баргузоршуда ҳисобида мешавад, ки дар овоздиҳӣ зиёда аз 50 дарсади шаҳрвандон иштирок ва овоз дода бошанд», – гуфт раиси КМИ. – Дар асоси ин маълумот, мо раъйпурсӣ оид ба лоиҳаи Қонуни конститутсионӣ дар Ӯзбекистонро баргузоршуда меҳисобем».

Натиҷаҳои ниҳоӣ дертар эълон хоҳанд шуд.

АИ "Дунё".