Jarayon yirik maydalash sexi boshligʻi Baxtiyor Eshboyevning OKMK bosh muhandisi Sergey Larionovga sex maʼdanini qabul qilishga tayyor ekanligi borasidagi hisobotidan boshlandi.
Shundan soʻng, maʼlumot maʼdan qabul qilish sexi boshqaruv pulti operatoriga yetkazildi va sexga kon transportlari tomonidan keltirilgan maʼdan tushirila boshlandi. Bunda “Yoshlik I” konidan keltirilgan maʼdan shu konning oʻzida joylashgan yirik maydalash sexining 1-bosqich maydalash uzelining qabul qiluvchi bunkerlariga yuklandi. Har bir bunker bir vaqtning oʻzida 2 tadan kon transportini qabul qilish imkoniyatiga ega. Shundan soʻng maʼdan KKD-1500/200 (180)M-2P rusumli konusli yirik maydalagichlarda maʼdan 300-350 mm gacha kattalikda maydalandi.
Keyingi bosqichda yirik maydalangan xomashyo 6 ta plastinkali taʼminlagichlar yordamida tasmali konveyerlar orqali uzunligi 4200 metrni tashkil etuvchi 2 ta magistral konveyerlarga kelib tushdi. Oʻz navbatida, har biri 1500 kilovatt quvvatiga ega boʻlgan 4 ta elektr dvigatellari bilan jihozlangan ushbu konveyerlarining har ikkalasi soatiga 6500 tonnadan maʼdanni, sekundiga 4 m tezlikda “Yoshlik I” konidan 3-Mis boyitish fabrikasida joylashgan umumiy sigʻimi 320 ming tonna boʻlgan yirik maydalangan maʼdan omboriga yetkazib beradi.
Ushbu ombordan maʼdan quruq gʻalvirlash boʻlimiga yuboriladi va reglamentga muvofiq texnologik jarayonning keyingi bosqichlariga uzatiladi.
Joriy yilning 29-mart kuni tarixiy voqea roʻy berdi. 3-Mis boyitish fabrikasining ilk konsentrati olindi. Mazkur tarixiy jarayonda OKMK boshqaruv raisi Abdulla Xursanov, kombinat masʼullari ishtirok etishdi.
Taʼkidlash joizki, konda huddi shunday yana 2 ta inshoot, birinchi va ikkinchi maydalab-yuklash majmualari qurilishi yakunlanib, foydalanishga topshirilish arafasida. Ahamiyatlisi, 3-MBFning texnologik jarayonlari aynan kondan boshlanadi. Yaʼni, 1500 mm kattalikgacha boʻlgan maʼdanlar ushbu qurilmalarda birlamchi maydalashdan oʻtadi.
Majmuada kon transportlaridan maʼdanni toʻkish jarayonida atrof-muhitga chang koʻtarilib ekologiyaga zarar yetkazilishining oldini olish maqsadida toʻliq avtomatlashtirilgan yuqori bosim ostida suv purkash tizimi joriy etilgan. Bu kelgusida “Yoshlik I” konini “yashil” kon deb eʼtirof etilishi uchun xizmat qiladi.
Shu kunlarda 3-Mis boyitish fabrikasida ishlab chiqarish boʻlinmalarini, texnologik liniyalarini va avtomatlashtirilgan boshqaruv tizimini bosqichma-bosqich ishga tushirish ishlari jadal amalga oshirilmoqda.
Hamkorlik materiali
