"Tromboz tananing bir yoki bir nechta qismi, masalan, oyoq, son-chanoq tomirlarida qon quyqasi hosil bo‘lishi bilan kechadi. Ular qon oqimini qisman yoki to‘liq to‘sib qo‘yadi. Bu vaqt o‘tishi bilan bir qator kasalliklar, hatto o‘limga ham olib kelishi mumkin, – deydi mutaxassis. – Agar tromb uzilib, qon oqimi bo‘ylab borib, o‘pka arteriyasiga tiqilib qolsa, o‘pka tromboemboliyasi rivojlanadi.
Oyoqlarda tromboz tufayli posttromboflebit sindromi ham kuchayishi mumkin. Bunda bemorning oyog‘ida qattiq shish, zichlashish, yallig‘lanish va keyinchalik yaralar paydo bo‘ladi.
Zamonaviy tibbiyot COVID-19 bilan kasallanganlar qon tomirlarida tromb hosil bo‘lish xavfi yuqori ekanligini tasdiqladi. Bu — koronavirusning eng jiddiy asoratlaridan biri. Mazkur holat o‘rtacha 30 foiz bemorlarda uchramoqda.
Keksa yoshli, tana vazni yuqori, jismoniy faolligi cheklangan, yurak-qon tomir va onkologik xataliklarga chalingan hamda o‘pka emboliyasi yoki chuqur tomir trombozidan aziyat chekuvchilar xavf guruhiga mansub aholi toifasiga kiradi.
Kuzatuvlarimizga ko‘ra, SOVID-19 dan keyingi sindrom ko‘pincha kasallikning ilk belgilari paydo bo‘lgan paytdan boshlab bir oy ichida o‘zini namoyon qilishi mumkin.
Hozir bu holat shifokorlarimizga yaxshi maʼlum va shu bois trombozning oldini olish uchun davolanish paytida bemorlarga antikoagulyant terapiya buyurilyapti.
Biroq kasallikning yengil bosqichida uy sharoitida davolanayotganlar bu asoratlar paydo bo‘lishi xavfiga jiddiy eʼtibor qaratmaydi. Oqibatda maʼlum vaqt o‘tgach, ular salomatligida o‘zgarishlar kuzatilayotganidan shikoyat qiladi.
Eng asosiy tavsiyamiz esa koronavirusga qarshi o‘z vaqtida, to‘liq bosqichda va buster dozada emlanish. Bu sizni nafaqat kasallikdan, balki uning xavfli asoratlari, xususan, trombozdan asraydi".
