Forumda 5 ta asosiy masala oʻrin olgan:
- Biznes jarayonlarini optimallashtirishda xalqaro mehmonxona brendining roli;
- Mehmondoʻstlik sohasida xizmatlar sifatini oshirishda professional kadrlar omili;
- Oʻzbekistonda mehmonxona ochish boʻyicha investitsiya loyihasi doirasida moliyaviy model;
- Xalqaro tajribada mehmonxona xizmatlarining turoperatorlar bilan oʻzaro hamkorligi;
- HORECAdagi tendensiyalar va yangiliklar. Qanday qilib mehmonxona restoranlari samaraliroq boʻlishi mumkin?
Turli darajadagi sayohat cheklovlari, emlash darajasi va sayohatchilarning sayohat xavfsizligiga ishonchi tufayli turizmning tiklanish surʼati dunyoning turli mintaqalarida sekin va notekisligicha qolmoqda.
“Soʻnggi yillarda Oʻzbekistonda turizm sohasini rivojlantirishga davlat rahbari darajasida yuksak eʼtibor qaratilyapti, ushbu yoʻnalishda faoliyat yurituvchi turistik biznes vakillariga qator imtiyoz va preferensiyalar berilyapti, — dedi turizm va madaniy meros vazirining birinchi oʻrinbosari Ulugbek Azamov. — Turizm sohasida tadbirkorlik subyektlarini qoʻllab-quvvatlash uchun joriy yil 9 oyi davomida 6,5 milliard soʻm miqdorida mablagʻ davlat byudjetidan subsidiya sifatida ajratildi. Bularning bari, oʻz oʻrnida, mamlakatimizda sayyohlik infratuzilmasini yanada yaxshilash, turistik xizmatlar sifatini oshirish hamda sohada faoliyat yurituvchi kadrlar malakasini yuksaltirishni talab etadi, albatta. Shuningdek, Oʻzbekistonda xalqaro toifadagi yuqori sifatli mehmonxona xizmatini tashkil etish qoʻllab-quvvatlanyapti”.
Bizning mamlakatimizda esa turizm sohasi jadal rivojlanib, sohaning oʻsish surʼatlari uchun shart-sharoitlar yaratilyapti.Bugungi kunga kelib, mamlakatimizda 1 327 ta joylashtirish obyekti faoliyat koʻrsatyapti, respublika boʻyicha xonalar soni 32 243 ta xonani tashkil etadi.
03.01.2022-yil holatiga koʻra, oilaviy mehmon uylari soni 2 481 tani, ulardagi oʻrinlar soni 21 239 tani, xostellar soni esa 384 ta boʻlib, 12 584 oʻrinni tashkil etadi.
Hukumatimiz saʼy-harakatlari bilan qator farmonlar joriy etildi. Xususan, 2022-yil 1-apreldan 2025-yil 1-yanvariga qadar umumiy ovqatlanish sohasidagi tadbirkorlik subyektlari uchun ijtimoiy soliq stavkalari 1 foiz miqdorida belgilandi.
Mehmonxona xizmatlari va joylashtirish vositalari uchun yuridik shaxslardan olinadigan yer soligʻi va yuridik shaxslardan olinadigan mol-mulk soligʻi stavkalari 90 foizga pasaytirildi. Viloyatlar va shaharlarning turistik zonalarida roʻyxatdan oʻtgan tadbirkorlik subyektlari uchun aylanma soliq stavkalari 1 foiz miqdorida belgilandi. Yuridik shaxslarning mol-mulk soligʻi va yer soligʻi ushbu turdagi soliqlar boʻyicha hisoblangan summaning 1 foizini tashkil etadi.
Har bir mehmonxona va boshqa turar joy obyektlari nogironlar aravachasidagilar uchun bir yoki bir nechta xonalarni jihozlashi, shuningdek, eshitish va koʻrish qobiliyati sust boʻlgan insonlarga odamlarning ehtiyojlaridan kelib chiqqan holda, eʼlonlar displey va ovozli qurilmalar bilan taʼminlashi shart boʻlgan turar joy binolariga qoʻyiladigan umumiy talablarga oʻzgartirishlar kiritildi.
Respublikamizning tarixiy hududlariga, xususan, Samarqand va Buxoro shaharlari mehmonxona xizmatlari bozoriga xalqaro mehmonxona brendlari kirib kelyapti. Xususan, Toshkent shahrida (2022-yil boshi holatiga koʻra) mehmonxona xizmatlari sohasida quyidagi xalqaro brendlar faoliyat yuritib kelyapti: Hilton -2ta mehmonxona, Wyndham — 2 ta mehmonxona, Radisson, Lotte, Marriot, ATECA Hotels.
“Oʻzbekiston biz uchun rivojlanishning asosiy vektorlaridan biri boʻlgani uchun bu tadbirga tashrif buyurdik. Mamlakat keng koʻlamda rivojlanayotganini va mehmonxonalarga boʻlgan talab oshib borayotganini koʻrib turibmiz. Biz allaqachon Oʻzbekistonda uchta yangi loyiha ochish boʻyicha shartnoma imzolaganmiz. “Oʻylaymanki, biz yil yakuniga qadar ushbu mamlakatning yetakchi brendlaridan biriga aylanamiz. Mazkur forum davlat tomonidan turizm sohasini qoʻllab-quvvatlayotgani va unga katta eʼtibor qaratilayotganidan dalolatdir” — dedi Accor New East Europe bosh direktori Aleksis Delaroff.
Raqamlarni 2018-yil bilan solishtirganda (2018-yilda mehmonxonalar soni – 5 ta, 2022-yil – 9 ta), xalqaro brend mehmonxonalar soni 45 foizga, xonalar soni esa 38 foizga oshgan (2018-yilda xonalar – 969 ta, 2022-yil – 1 576 ta) ).
2023-yilga kelib, Toshkent mehmonxona bozoridan yuqori va oʻrta narx segmentlaridan – Holiday Inn, Intercontinental , Curio Collection by Hiltonda faoliyat yurituvchi yana kamida uchta operator oʻrin olishi rejalashtirilgan.
Shuningdek, Oʻzbekiston mehmonxonalar assotsiatsiyasi Oʻzbekistonda joylashtirish vositalarini yagona davlat standartlari va tavsiflarini balli baholash tizimini yoʻlga qoʻyish boʻyicha katta ishlarni amalga oshiryapti, deb xabar beradi Turizm va madaniy meros vazirligi matbuot xizmati.
