Nufuzli musobaqada jahonning 61ta davlatidan jami 399 nafar yosh atlet gʻoliblik uchun supachaga chiqishdi. Jahon kubogida Oʻzbekiston sharafini 7 nafar atletimiz himoya qildi.

Bungacha vakillarimizdan Nigora Abdullayeva (-55 kg) hamda Xusenboy Matrasulovlar (-55 kg) oʻz vazn toifalarida oltin, Nigora Suvonova (-71 kg) kumush, Xojiakbar Olimov esa (-81 kg) bronza medallariga sazovor boʻlishgandi.

Oʻsmirlar oʻrtasida onlayn Jahon kubogining soʻnggi kunida yana bir sportchimiz, -96 kg vazn toifasida Qurbonmurod Nomozov umumiy 320 kg natija koʻrsatib, mutlaq gʻoliblikni qoʻlga kiritdi. U eng yaqin taʼqibchisi, turkiyalik Emre Ozturkni 15 kiloga ortda qoldirdi.

Sportchimizning bu gʻalabasi Oʻzbekiston Respublikasi Davlat bayrogʻi qabul qilinganining 29 yilligiga munosib tuhfa boʻldi.