So‘nggi yillarda mamlakatimizda seysmologiya, inshootlarning seysmik mustahkamligini va seysmik xavfsizlikni ta’minlash sohalarini rivojlantirish hamda soha tashkilotlarining faoliyati samaradorligini tubdan oshirish bo‘yicha keng ko‘lamli kompleks chora-tadbirlar amalga oshirildi. bugungi kunda bu sohalardagi islohotlarni izchil davom ettirish, aholining seysmik xavfsizligini ta’minlashning yangi usullarini joriy qilish muhim ahamiyat kasb etmoqda.
Seysmologiya, inshootlarning seysmik mustahkamligini va seysmik xavfsizlikni ta’minlash sohalarida islohotlarning aniq manzilliligini ta’minlash, sohalarga raqamli texnologiyalarni keng joriy etish, yuqori malakali kadrlar tayyorlash jarayonini sifat jihatidan yangi bosqichga ko‘tarishning ustuvor yo‘nalishlarini belgilash maqsadida:
1. Quyidagilar:
O‘zbekiston Respublikasi aholisi va hududining seysmik xavfsizligini ta’minlash tizimini 2025 yilgacha takomillashtirish konsepsiyasi (keyingi o‘rinlarda – Konsepsiya) hamda uning maqsadli ko‘rsatkichlari va indikatorlari 1 va 1a-ilovalarga muvofiq;
O‘zbekiston Respublikasi aholisi va hududining seysmik xavfsizligini ta’minlash tizimini 2025 yilgacha takomillashtirish konsepsiyasiни 2022 – 2023 yillarda amalga oshirish “yo‘l xaritasi” (keyingi o‘rinlarda – “yo‘l xaritasi”) 2-ilovaga muvofiq tasdiqlansin.
Belgilansinki, Konsepsiyani 2024 – 2025 yillarda amalga oshirish bo‘yicha “yo‘l xaritasi” Vazirlar Mahkamasi tomonidan alohida tasdiqlanadi.
2. Belgilansinki, Konsepsiya hamda uning maqsadli ko‘rsatkichlari, shu jumladan, quyidagilarni nazarda tutadi:
a) seysmologiya yo‘nalishi doirasida:
zilzilalarning vujudga kelish mexanizmi va tabiatining hamda zilzila darakchilarining turli geodinamik jarayonlarda namoyon bo‘lishini tadqiq qilish mexanizmini takomillashtirish;
hududlarni makroseysmik ballarda va muhandislik ko‘rsatkichlarda seysmik mikrohududlashtirish bo‘yicha onlayn-xaritalarni ishlab chiqish;
turli darajadagi tektonik yer yoriqlarining o‘rta masshtabdagi xaritasini yaratish va ularning seysmik potensialini baholash;
b) bino va inshootlarning zilzilabardoshligini ta’minlash yo‘nalishi doirasida:
yakka tartibdagi uy-joylarning zilzilabardoshligini ta’minlash bo‘yicha zarur choralarni ko‘rish;
bino va inshootlar hamda suv omborlari to‘g‘onlarining zilzilabardoshlik darajasini doimiy kosmik monitoring qilish tizimini joriy etish;
v) seysmologik kuzatuvlar tarmog‘ini takomillashtirish yo‘nalishi doirasida:
avtomatlashtirilgan kompleks-prognostik stansiyalarni ko‘paytirish hisobiga respublika hududini to‘liq monitoring qilish imkoniyatini kengaytirish;
milliy seysmik kuzatuvlar tarmog‘ining xalqaro seysmik kuzatuvlar global tizimiga kiritilgan stansiyalar bilan doimiy aloqalarini ta’minlash;
g) seysmik xavfsizlikni ta’minlash sohasidagi davlat boshqaruv organlari faoliyatini muvofiqlashtirish yo‘nalishi doirasida:
seysmologiya sohasida ilm-fan va ta’limni rivojlantirish hamda aholi va davlat organlarini zilzilada harakat qilishga tayyorlash faoliyatini tartibga solish;
respublika hududida qurilayotgan bino va inshootlar, suv omborlari va gidrotexnika inshootlari zilzilabardoshligini nazorat qilish tizimini takomillashtirish.
3. Quyidagilar:
Konsepsiya va “yo‘l xaritasi”da belgilangan chora-tadbirlarning o‘z vaqtida va samarali amalga oshirilishini ta’minlash yuzasidan davlat organlarining birinchi rahbarlariga shaxsiy mas’uliyat yuklatilsin;
Seysmologiya, seysmik chidamli qurilish hamda O‘zbekiston Respublikasi aholisi va hududining seysmik xavfsizligi bo‘yicha idoralararo ilmiy-texnik kengash (keyingi o‘rinlarda – Kengash) davlat organlari tomonidan Konsepsiya va “yo‘l xaritasi”da belgilangan chora-tadbirlarning sifatli va o‘z vaqtida amalga oshirilishini nazorat qilish hamda muvofiqlashtirish uchun mas’ul etib belgilansin.
4. Shunday tartib o‘rnatilsinki, unga muvofiq:
a) 2022 yil 1 sentyabrdan boshlab respublikaning seysmik faol zonalarida yangi qurilishi rejalashtirilayotgan xavflilik omili IV toifaga mansub bo‘lgan ob’ektlarga zilzilabardoshlik bo‘yicha xulosalar berish tartibi joriy etiladi.
Bunda, Qurilish vazirligi ekspertizadan o‘tkazilgan xavflilik omili IV toifaga mansub ob’ektlarning loyiha-smeta hujjatlarini ilmiy xulosalar olishga yo‘naltirishga, Fanlar akademiyasi ob’ektlarga zilzilabardoshlik bo‘yicha ilmiy xulosalar berishga mas’ul etib belgilansin.
Fanlar akademiyasi Qurilish vazirligi bilan birgalikda ikki oy muddatda O‘zbekiston Respublikasining seysmik faol zonalarida qurilishi rejalashtirilayotgan xavflilik omili IV toifaga mansub bo‘lgan bino va inshootlarga zilzilabardoshlik bo‘yicha xulosalar berish tartibini joriy etish to‘g‘risida normativ-huquqiy hujjat loyihasini ishlab chiqsin va belgilangan tartibda Vazirlar Mahkamasiga kiritsin;
b) Fanlar akademiyasi tomonidan Respublikaning seysmik faol zonalarida joylashgan bino va inshootlar elektron texnik pasportlarining yagona integratsiyalashgan platformaсиdagи ma’lumotlar asosida seysmik zaif ijtimoiy soha ob’ektlarining ro‘yxatini har yili 1 aprelga qadar shakllantirib borish hamda instrumental-texnik tekshiruvdan o‘tkazish ishlarini Vazirlar Mahkamasi bilan kelishgan holda tashkillashtirish amaliyoti yo‘lga qo‘yiladi.
Bunda, instrumental-texnik tekshiruv ishlari uchun mablag‘lar Seysmologiya, inshootlarning seysmik mustahkamligini va seysmik xavfsizlikni ta’minlash sohasini qo‘llab-quvvatlash jamg‘armasi (keyingi o‘rinlarda – Jamg‘arma) hisobidan qoplanishi belgilansin;
v) 2022 yil 1 oktyabrdan boshlab respublika hududidagi ko‘p kvartirali uy-joylarni yillar kesimida zilzilabardoshlik bo‘yicha xatlovdan o‘tkazish amaliyoti yo‘lga qo‘yiladi va xatlov natijasiga ko‘ra ekspluatatsiya muddatini o‘tab bo‘lgan seysmik zaif va avariya alomatlari aniqlangan ko‘p kvartirali uy-joylar o‘rnida bosqichma-bosqich yangi uy-joylar qurish bo‘yicha takliflar mahalliy davlat hokimiyati organlariga kiritib boriladi.
Bunda, Uy-joy kommunal xizmat ko‘rsatish vazirligi ko‘p kvartirali uy-joylarni zilzilabardoshlik bo‘yicha xatlovdan o‘tkazishga mas’ul bo‘lgan davlat boshqaruvi organi etib belgilansin;
g) 2023 yil 1 maydan boshlab suv omborlari to‘g‘onlarining zilzilabardoshligini doimiy kosmik monitoring qilish tizimi yo‘lga qo‘yilib, mazkur yo‘nalishdagi mas’ul davlat organlari kosmik suratlar hamda ishlov berilgan ma’lumotlar bilan ta’minlab boriladi.
Vazirlar Mahkamasi huzuridagi Kosmik tadqiqotlar va texnologiyalar agentligi mazkur tizimni yo‘lga qo‘yish uchun mas’ul davlat organi etib belgilansin.
5. Fanlar akademiyasi:
2022 yil 1 iyulga qadar seysmologiya, inshootlarning seysmik mustahkamligini va seysmik xavfsizlikni ta’minlash sohasidagi mutaxassislar hamda ilmiy doira vakillarini keng jalb qilgan holda Seysmik xatarni kamaytirish dasturини ishlab chiqsin va belgilangan tartibda Vazirlar Mahkamasiga kiritsin;
2022 yil 1 avgustga qadar seysmologiya, inshootlarning seysmik mustahkamligini va seysmik xavfsizlikni ta’minlash sohasi muammolarining ilmiy yechimiga qaratilgan takliflarni (tematik mavzularni) shakllantirib, Innovatsion rivojlanish vazirligiga taqdim etsin;
2023 yil 1 fevralga qadar Toshkent shahridagi Turin politexnika universiteti olimlari bilan hamkorlikda rivojlangan davlatlarda qo‘llanilayotgan makroseysmik shkalalarni o‘rganib chiqib, “UMS-22” milliy makroseysmik shkalani ishlab chiqsin;
2022 – 2025 yillar davomida Andijon, Toshkent, Guliston, Nurafshon, Namangan, Farg‘ona, Samarqand, Jizzax, Buxoro, Navoiy, Qarshi, Termiz, Nukus, Urganch shaharlarining raqamlashtirilgan seysmik mikrohududlashtirish xaritalarini ishlab chiqsin.
6. 2023 yil 1 apreldan boshlab suv omborlari to‘g‘onlarida seysmik xavfni oldindan prognoz qilish va baholash amaliyotini joriy qilish maqsadida:
kosmik monitoring doirasida simulyatsion dastur orqali zilzila natijasida to‘g‘on o‘pirilishi oqibatida suv bosishi mumkin bo‘lgan respublika hududlarining vizual 3D modellarini ishlab chiqish amaliyoti yo‘lga qo‘yilsin;
suv omborlari to‘g‘onlari o‘pirilishi oqibatida qutqaruv ishlarini tashkillashtirishida tegishli vazirlik va idoralarni zarur kosmik suratlar hamda ishlov berilgan ma’lumotlar bilan ta’minlash tizimi joriy etilsin.
Vazirlar Mahkamasi huzuridagi Kosmik tadqiqotlar va texnologiyalar agentligi Fanlar akademiyasi, Favqulodda vaziyatlar vazirligi, Suv xo‘jaligi vazirligi va Suv xo‘jaligi ob’ektlari xavfsizligini nazorat qilish davlat inspeksiyasi bilan birgalikda 2023 yil 1 fevralga qadar mazkur amaliyot va tizim ishga tushirilishini ta’minlasin.
7. Belgilansinki, 2023 yildan boshlab respublikaning seysmik faol zonalarida balandligi 9 qavat yoki undan yuqori bo‘lgan seriyali qurilishi rejalashtirilgan yoki tanlab olingan bino va inshootlarning zilzilabardoshligini oshirish, sifatini ta’minlash hamda kamchiliklarni oldindan bartaraf etish maqsadida vibrodinamik uskuna yoki zamonaviy raqamlashtirilgan instrumental asbob-uskunalar yordamida sinov va tekshiruv o‘tkazib boriladi.
Bunda, sinov va tekshiruvlar qurilish ishlariga mas’ul bo‘lgan buyurtmachi tashkilotlar tomonidan o‘tkazilishi belgilab qo‘yilsin.
8. Qurilish vazirligi 2022 yil 1 dekabrga qadar O‘zbekiston sharoitida so‘nggi zamonaviy usullarni o‘rganib, tahlil qilgan holda “Ko‘p qavatli binolarni loyihalash” shaharsozlik normalari
va qoidalarini ilmiy-tadqiqot va tajriba-sinov natijalari asosida ishlab chiqish jarayoni bo‘yicha Kengashga axborot kiritsin.
9. Transport vazirligi:
a) 2022 yil 1 dekabrga qadar:
respublikadagi barcha sun’iy inshootlarni (ko‘priklar, tonnellar, estakadalar, temir yo‘l ko‘priklari va boshqalar) xatlovdan o‘tkazsin va uning natijalarini umumlashtirib, yagona raqamlashtirilgan ma’lumotlar bazasini tashkil etsin;
aniqlangan egasiz sun’iy inshootlarni idoraviy mansubligi bo‘yicha biriktirish to‘g‘risida Vazirlar Mahkamasiga taklif kiritsin;
b) 2023 yil 1 martga qadar respublikadagi barcha mavjud sun’iy inshootlarning zilzilabardoshligi bo‘yicha elektron texnik pasportlarni shakllantirsin hamda ularning Respublikaning seysmik faol zonalarida joylashgan bino va inshootlar elektron texnik pasportlarining yagona integratsiyalashgan platformasiga kiritilishini ta’minlasin.
10. Suv xo‘jaligi vazirligi va “O‘zbekgidroenergo” AJ:
2022 yil 1 avgustga qadar birinchi bosqichda 2022 – 2023 yillarda I va II sinfga kiruvchi 32 ta, ikkinchi bosqichda 2024 – 2025 yillarda III va IV sinfga kiruvchi 26 ta suv omborlarida seysmologik kuzatuvlarni olib borish uchun zarur asbob-uskunalar xaridini amalga oshirish bo‘yicha asoslangan takliflarni Vazirlar Mahkamasiga kiritsin;
Favqulodda vaziyatlar vazirligi va Fanlar akademiyasi bilan birgalikda 2023 yil 1 iyulga qadar tasarrufidagi toifalangan suv omborlari va gidrotexnika inshootlarining zilzilabardoshlik bo‘yicha ekspertizasi ekspress uslubiyot asosida o‘tkazilishini ta’minlasin.
11. 2022 yil 1 avgustga qadar Suv xo‘jaligi vazirligi markaziy apparatida mavjud shtat birliklari doirasida seysmologik kuzatuvni doimiy tashkillashtirish bo‘yicha mutaxassis lavozimi joriy etilsin;
Suv xo‘jaligi vazirligi mazkur shtat birligiga soha bo‘yicha tajribaga ega bo‘lgan mutaxassis kadrni tayinlash chorasini ko‘rsin.
12. Quyidagilar:
a) Kengash tomonidan tasdiqlangan reja-grafik asosida Suv xo‘jaligi vazirligi tizimidagi suv omborlarida seysmologik kuzatuvlarni o‘tkazish bo‘yicha xarajatlar mahalliy byudjet mablag‘lari hisobidan qoplanishi belgilansin.
Qoraqalpog‘iston Respublikasi Vazirlar Kengashi va viloyatlar hokimliklari suv omborlarida seysmologik kuzatuvlarni o‘tkazish uchun mablag‘larni o‘z vaqtida ajratib borilishini ta’minlasin;
b) Fanlar akademiyasi va Favqulodda vaziyatlar vazirligi Suv xo‘jaligi vazirligining buyurtmasiga asosan seysmologik kuzatuvlarning o‘z vaqtida va sifatli o‘tkazilishini ta’minlasin.
13. Shunday tartib o‘rnatilsinki, 2023 yil 1 yanvardan boshlab:
a) seysmik xavfsizlikni ta’minlash bo‘yicha davlat organlari rahbar kadrlari va xodimlarining Aholining barcha qatlamlarini zilzilaga tayyorlashga mo‘ljallangan milliy elektron platforma orqali malakasini oshirish va qayta tayyorlash kurslari o‘tkazib boriladi.
Bunda, malaka oshirish va qayta tayyorlash kurslari rahbar kadrlarning aholiga zilzilalar vaqtida o‘zini tutish qoidalarini tushuntirish, kuchli zilzilalardan talafotlarsiz chiqish hamda kuchli zilzilalarga tayyorgarlik ko‘rish bo‘yicha ko‘nikmalarini oshirishga yo‘naltiriladi;
b) Favqulodda vaziyatlar vazirligi va Fanlar akademiyasi:
har uch yilda malaka oshirish va qayta tayyorlash kurslarini tashkil etib boradi;
milliy elektron platformaga malaka oshirish bo‘yicha zamonaviy dasturlarni ishlab chiqib, kiritadi va muntazam ravishda yangilab boradi.
Favqulodda vaziyatlar vazirligi Fanlar akademiyasi bilan birgalikda 2022 yil 1 dekabrga qadar milliy elektron platformaning yuritilishi hamda malaka oshirish va qayta tayyorlash kurslarini o‘tkazish tartibini tasdiqlasin va amalga kiritsin.
14. Favqulodda vaziyatlar vazirligi:
Axborot texnologiyalari va kommunikatsiyalarini rivojlantirish vazirligi bilan birgalikda 2022 yil 1 avgustga qadar aholining barcha qatlamini zilziladan oldin, zilzila vaqtida va zilziladan so‘ng to‘g‘ri harakat qilishga mustaqil o‘rgatish uchun mo‘ljallangan mobil ilovani ishlab chiqsin;
2023 yil 1 iyunga qadar O‘zbekiston Respublikasi aholisini zilzilaga tayyorlash tartibi to‘g‘risidagi nizomni tasdiqlashni nazarda tutuvchi Hukumat qarori loyihasini ishlab chiqsin va belgilangan tartibda Vazirlar Mahkamasiga kiritsin.
15. Seysmik mustahkam bino va inshootlarni loyihalash, qurish va ekspluatatsiya qilish yo‘nalishida malakali kadrlarni tayyorlash tizimini hududlar kesimida kengaytirish maqsadida:
2022/2023 o‘quv yilidan boshlab Namangan muhandislik-qurilish instituti va Farg‘ona politexnika institutida “Bino va inshootlar zilzilabardoshligi” ta’lim mutaxassisligi bo‘yicha kadrlarni tayyorlash amaliyoti yo‘lga qo‘yilsin;
Oliy va o‘rta maxsus ta’lim vazirligi Iqtisodiy taraqqiyot va kambag‘allikni qisqartirish vazirligi bilan birgalikda mazkur ta’lim mutaxassisligi bo‘yicha qabul ko‘rsatkichlarini 2022/2023 o‘quv yili uchun davlat buyurtmasi parametrlariga amaldagi kvotalar doirasida kiritish choralarini ko‘rsin.
16. Oliy va o‘rta maxsus ta’lim vazirligi va Toshkent shahridagi Turin politexnika universitetining quyidagi takliflariga rozilik berilsin:
Toshkent shahridagi Turin politexnika universitetida 2022/2023 o‘quv yilidan boshlab “Tarixiy obidalarning seysmik mustahkamligi” ta’lim mutaxassisligini ochish;
2022 yil 1 dekabrga qadar Toshkent shahridagi Turin politexnika universitetida zilzilalar ko‘p uchraydigan xavfli hududlar uchun turli xil darajadagi tabiiy ofatlar ssenariylarining zamonaviy kompyuter modellarini hamda ko‘rilgan zararlarni hisoblash usullarini ishlab chiqish va o‘quv dasturlariga kiritish;
2022 yil 1 sentyabrdan boshlab Toshkent shahridagi Turin politexnika universitetida “Bino va inshootlarni zamonaviy kompyuter dasturlari yordamida modellashtirish” fani bo‘yicha oliy ta’lim tashkilotlari professor-o‘qituvchilari va talabalari uchun intensiv kurslarni tashkil etish.
17. Quyidagilar:
“Toshkent irrigatsiya va qishloq xo‘jaligini mexanizatsiyalash muhandislari instituti” milliy tadqiqot universitetida gruntli inshootlar, suv omborlarining to‘g‘onlari, asos va poydevorlarni zilzilabardoshlik bo‘yicha zamonaviy raqamli hisoblash usullari va dasturlari (Plaxis, Ansys, Abaqus va boshqalar) yordamida baholashga mo‘ljallangan “Suv omborlari va gidrotexnika inshootlarining zilzilabardoshligini baholash” o‘quv-ilmiy laboratoriyasi;
Namangan muhandislik-qurilish institutida bino va inshootlarning zilzilabardoshlik bo‘yicha texnik holatini baholash, aktiv seysmik himoyalash usullari bo‘yicha ilmiy tadqiqotlar olib borishga mo‘ljallangan “Bino va inshootlarni seysmik himoyalash” o‘quv-ilmiy laboratoriyasi tashkil etilsin.
Belgilansinki, o‘quv-ilmiy laboratoriyalarning shtat birliklari “Toshkent irrigatsiya va qishloq xo‘jaligini mexanizatsiyalash muhandislari instituti” milliy tadqiqot universiteti hamda Namangan muhandislik-qurilish institutining professor-o‘qituvchilarini maqbullashtirish hisobidan jamlanadi.
Vazirlar Mahkamasi “Toshkent irrigatsiya va qishloq xo‘jaligini mexanizatsiyalash muhandislari instituti” milliy tadqiqot universiteti va Namangan muhandislik-qurilish institutining asoslangan takliflariga muvofiq o‘quv-ilmiy laboratoriyalarni zarur jihozlar bilan bosqichma-bosqich Jamg‘arma mablag‘lari hisobidan ta’minlash choralarini ko‘rsin.
18. Vazirlar Mahkamasi ikki oy muddatda seysmik xavfsizlikni ta’minlash bo‘yicha ilg‘or xorijiy tajribani o‘rganish maqsadida soha xodimlari va Kengash a’zolaridan iborat delegatsiyani shakllantirib, xorijiy mamlakatlarga qisqa muddatli tanishtiruv-stajirovka kurslarini tashkil etish choralarini ko‘rsin.
Belgilansinki, tanishtiruv-stajirovka kurslarini tashkil etish bilan bog‘liq xarajatlar Jamg‘arma mablag‘lari hisobidan qoplansin.
19. Vazirlar Mahkamasi huzuridagi Kosmik tadqiqotlar va texnologiyalar agentligi:
2022 yil 1 dekabrga qadar Fanlar akademiyasi, Favqulodda vaziyatlar vazirligi bilan hamkorlikda respublikadagi seysmik faol, o‘rta faol va tinch hududlar hamda maydonlarni o‘zida mujassamlashtirgan interaktiv onlayn-xaritani ishlab chiqsin;
2023 yil 1 avgustga qadar seysmik faol zonalarda joylashgan bino va inshootlar maydonining zilzilalar oqibatida deformatsiyasi, siljishi, cho‘kishi kabi omillarni aniqlashga mo‘ljallangan radiolokatsion kosmik monitoring tizimini yaratsin.
20. Fanlar akademiyasining Mexanika va inshootlar seysmik mustahkamligi instituti uchun ajratilgan yer maydonida alohida ma’muriy va laboratoriya binosini qurish, mavjud bino va inshootlarni mukammal ta’mirlash hamda jihozlash to‘g‘risidagi taklifiga rozilik berilsin.
Fanlar akademiyasi Iqtisodiy taraqqiyot va kambag‘allikni qisqartirish vazirligiga mazkur bandda nazarda tutilgan qurilish-ta’mirlash va jihozlash ishlarini 2023 yil uchun O‘zbekiston Respublikasining ijtimoiy va ishlab chiqarish infratuzilmasini rivojlantirish dasturiga kiritish bo‘yicha takliflarni taqdim etsin.
21. Jamg‘arma hisobidan moliyalashtiriladigan xorijiy davlatlarda ishlab chiqarilgan laboratoriya asbob-uskunalari, hisoblash texnika vositalari hamda butlovchi materiallarini qabul qiluvchi tashkilotlar bojxona to‘lovlaridan (bojxona rasmiylashtiruvi yig‘imlari bundan mustasno) 3 yil muddatga ozod qilinsin.
22. O‘zbekiston Respublikasi Prezidentining ayrim hujjatlariga 3-ilovaga muvofiq qo‘shimcha va o‘zgartirishlar kiritilsin.
23. Fanlar akademiyasi Favqulodda vaziyatlar vazirligi, Qurilish vazirligi hamda boshqa manfaatdor vazirlik va idoralar bilan birgalikda uch oy muddatda qonunchilik hujjatlariga ushbu Farmondan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.
24. Mazkur Farmonning ijrosini samarali tashkillashtirishga mas’ul va shaxsiy javobgar etib favqulodda vaziyatlar vaziri A.X.Qo‘ldoshev, qurilish vaziri B.I.Zakirov, suv xo‘jaligi vaziri Sh.R.Xamrayev va Fanlar akademiyasi prezidenti B.S.Yuldashev belgilansin.
Farmon ijrosi uchun mas’ul idoralar faoliyatini muvofiqlashtirish va nazorat qilish O‘zbekiston Respublikasining Bosh vaziri A.N. Aripov zimmasiga yuklansin.
Amalga oshirilgan chora-tadbirlarning natijadorligi to‘g‘risida har yarim yil yakunlari bo‘yicha O‘zbekiston Respublikasi Prezidentiga axborot kiritilsin.
O‘zbekiston Respublikasi
Prezidenti Sh.MIRZIYOEV
Toshkent shahri,
2022 yil 30 may
