Bu haqda Oʻzbekiston Respublikasi investitsiyalar, sanoat va savdo vazirligi axborot xizmati maʼlum qildi.
Shu yilning 17-noyabr kuni Bosh vazir oʻrinbosari Jamshid Xodjayev Osiyo taraqqiyot banki Prezidenti Masato Kanda bilan uchrashdi. Uchrashuvda ISSV vazirining oʻrinbosari Akram Aliyev ham ishtirok etdi.
Tomonlar Oʻzbekiston — OTB samarali munosabatlarining 30-yilligini qayd etib, hamkorlik natijalari va kelgusidagi yoʻnalishlarni muhokama qildi.
Taʼkidlanganidek, hamkorlik transport, energetika, suv taʼminoti, taʼlim, xususiy sektorni qoʻllab-quvvatlash kabi ustuvor yoʻnalishlarda izchil rivojlanmoqda. Oʻzbekiston tomoni aholining turmush sifatini oshirishga qaratilgan loyihalardagi koʻmagi uchun OTBga minnatdorlik bildirdi.
2026-yil may oyida Samarqandda oʻtadigan OTB Boshqaruvchilar kengashining 59-yillik yigʻilishiga tayyorgarlik muhokama qilindi. Ushbu jarayonini muvofiqlashtirish uchun qoʻshma yoʻl xaritasini tasdiqlash taklif etildi.
Shuningdek, moliyalashtirish mexanizmlarini kengaytirish, iqtisodiy zonalar infratuzilmasini rivojlantirish, ayollar va yoshlar bandligini qoʻllab-quvvatlash, eksportga yoʻnaltirilgan korxonalarni ragʻbatlantirish kabi oʻrta muddatli tashabbuslar koʻrib chiqildi. Tomonlar 2026–2030-yillar uchun yangi Hamkorlik dasturi boʻyicha ham fikr almashdilar.
Uchrashuv soʻnggida maktablarda STEM-taʻlimni modernizatsiya qilishga qaratilgan “Oʻrta taʻlimda STEM” loyihasi uchun 100 mln dollarlik kredit kelishuvi imzolandi.
