U bino ichiga qalampir purkagan va keyin qo'riqchi va to'rtinchi sinf o'quvchisini pichoqlagan. Bola olgan jarohatlari oqibatida vafot etdi.
“Bugun soat 9:00 da politsiyaga o'quvchining qo'riqchiga pichoq bilan zarba bergani, qalampir purkagani va keyin o'n yoshli o'quvchini pichoqlagani va u jarohat tufayli vafot etgani haqida xabar kelib tushdi”, deb xabar berdi Podmoskovye politsiyasi. “Biz qattiq qayg'udamiz, maktabda to'rtinchi sinf o'quvchisi bo'lgan bola vafot etdi”, deb yozdi Telegramda Podmoskovye bolalar huquqlari bo'yicha ombudsmani Kseniya Mishonova.
Huquqni muhofaza qilish organlarining ma'lumotlariga ko'ra, hujum uyushtirgan shaxs o'sha maktabning 15 yoshli o'quvchisi. U hibsga olingan. Rossiya Tergov qo'mitasi qotillik va qotillikka urinish bo'yicha jinoiy ish qo'zg'atdi.
Uspenskaya umumiy o'rta maktabi Podmoskovyening g'arbiy qismida, Moskva bilan bevosita chegaradosh Odintsovo tumanidagi Gorki-2 qishlog'ida joylashgan. Maktabda mingdan ortiq o'quvchilar, jumladan, qo'shni qishloqlardan ham kelib tahsil oladi.
Favqulodda xizmatlar maktab binosiga etib kelganidan so'ng, ba'zi o'quvchilar qo'shni Yoshlar markaziga evakuatsiya qilindi, deb xabar berdi delfi.lt.
