Bu haqda Energetika vazirligi xabar qildi.

Uchrashuv O‘zbekiston Energetika vazirligi, Qirg‘iziston va Qozog‘iston energetika idoralari hamraisligida tashkil etildi. Unda O‘zbekiston tomonidan vazir o‘rinbosari Umid Mamadaminov hamda vazirlik mas’ul xodimi Umarxo‘ja Niğmonov ishtirok etdi.

Muzokaralar davomida tomonlar “Qambarota GES-1” loyihasini amalga oshirishga oid hukumatlararo kelishuv loyihasini muhokama qildi.

Mazkur loyiha suv-energetika sohasidagi muhim mintaqaviy tashabbuslardan biri bo‘lib, Markaziy Osiyo davlatlarining energetik xavfsizligini mustahkamlashga qaratilgan. Loyiha doirasida Qirg‘iziston hududidagi Norin daryosida quvvati 1880 MVt bo‘lgan yirik gidroelektr stansiya qurilishi rejalashtirilgan.

Muzokaralarda uch mamlakatning tegishli davlat organlari va sohavi tashkilotlari vakillari ishtirok etdi. Shuningdek, Jahon banki vakillari kuzatuvchi sifatida qatnashib, ushbu tashkilotning loyihadagi asosiy xalqaro moliyaviy sherik sifatidagi o‘rnini tasdiqladi.

Uchrashuv yakunida tomonlar hukumatlararo kelishuvni kelishish bo‘yicha hamkorlikni davom ettirishga kelishib oldi. Navbatdagi muzokaralar 2026 yil aprel oyida Toshkent shahrida o‘tkazilishi rejalashtirilgan.