Kambagʻallikni qisqartirish va bandlik vazirligining xabar berishicha, 2024-yili qurilish sohasida 204 ta baxtsiz hodisa qayd etilgan boʻlib, ular oqibatida 71 nafar ishchi halok boʻlgan.
2025-yilda esa holat yanada ogʻirlashgan: baxtsiz hodisalar soni 234 taga, vafot etganlar soni esa 99 nafarga yetgan. Bu koʻrsatkichlar hodisalar ham, oʻlim bilan yakunlanayotgan holatlar ham oshib borayotganini anglatadi.
Mutaxassislar fikricha, baxtsiz hodisalarning aksariyati quyidagi omillar bilan bogʻliq:
- mehnat xavfsizligi qoidalariga rioya etilmasligi;
- ishchilarning shaxsiy himoya vositalari bilan toʻliq taʼminlanmasligi;
- qurilish maydonlarida doimiy nazoratning yoʻqligi;
- rahbarlar tomonidan masʼuliyatga yetarli eʼtibor berilmasligi.
Eng tashvishli jihati — ushbu holatlarning katta qismi oldindan oldini olish mumkin boʻlgan xavfli vaziyatlar hisoblanadi.
Mutaxassislar qurilish tashkilotlari rahbarlari mehnat xavfsizligini hujjat uchun emas, ishchining hayoti uchun ustuvor masala sifatida koʻrishi zarurligini taʼkidlamoqda. Shuningdek, vakolatli organlar tomonidan profilaktik nazoratni kuchaytirish, xavfli obyektlarni tizimli monitoring qilish va qonunbuzilishlarga nisbatan qatʼiy choralar koʻrish muhimligi qayd etilmoqda.
Qayd etilishicha, mehnat xavfsizligi — faqat nazorat idoralari yoki ish beruvchilarning emas, balki butun jamiyatning umumiy masʼuliyati hisoblanadi. Loqaydlik esa fojialar sonining kamayishiga olib kelmaydi.
