Ushbu yo‘nalish Parij-2024'ga ko‘rgazmali dastur sifatida kiritilgan bo‘lsa, Los-Anjeles-2028 Olimpiadasidan boshlab medallar jamlanmasi o‘ynalishi kutilmoqda.
Kecha Xitoyda yakuniga yetgan Jahon kubogida O‘zbekiston terma jamoasining qo‘lga kiritgan kumush medali katta ahamiyatga ega. Boisi, terma jamoa tarkibida Ulug‘bek Rashitov, Svetlana Osipova kabi yetakchilar ishtirok etmagan bo‘lsa ham, bellashuvlar davomida ushbu sport vatani bo‘lmish – Janubiy Koreya jamoasi mag‘lub etildi. Jangovar tarkibda qatnashgan Xitoy bilan tengma-teng raqobat olib borildi.
Jahon kubogidagi natija sportchilarimizga Parij-2024 Olimpiadasi doirasida o‘tkaziladigan ko‘rgazmali dasturda qatnashish imkoniyatini taqdim qildi. Unda faqatgina Fransiya, O‘zbekiston, Xitoy va Janubiy Koreya jamoalari o‘rtasida bahs kechadi.
