Unga koʻra:
2021-yil 1-yanvardan boshlab taʼlim sifatini nazorat qilish sohasida:
taʼlim sifatini baholashning raqamli texnologiyalar asosida takomillashtirilgan ichki va tashqi tizimlari joriy qilinadi;
taʼlim sifatini ichki baholash taʼlim tashkilotlari tomonidan mustaqil tarzda shaffoflik va hisobdorlik tamoyillari asosida oʻtkaziladi;
Oʻzbekiston Respublikasi Maktabgacha taʼlim vazirligi, Xalq taʼlimi vazirligi, Oliy va oʻrta maxsus taʼlim vazirligi, tizimida taʼlim tashkilotlari boʻlgan vazirliklar va idoralar, ularning hududiy boshqarmalari va boʻlimlari tegishlicha taʼlim tashkilotlarida taʼlim sifatini ichki baholash jarayonini tashkil etish va oʻtkazishga koʻmaklashadi;
taʼlim sifatini tashqi baholash tekshiruvlar oʻtkazish, attestatsiya va davlat akkreditatsiyasidan oʻtkazish, litsenziya talablari va shartlariga rioya etilishini oʻrganish, reytinglar tuzish, monitoring qilish hamda qonunchilikda belgilangan boshqa shakllarda Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi (keyingi oʻrinlarda – Taʼlim inspeksiyasi) tomonidan amalga oshiriladi;
Oʻzbekiston Respublikasining taʼlim sifatini xalqaro baholash (PIAAC, ICILS, ICCS, LANA va boshqa) dasturlarida ishtirokini kengaytirish orqali milliy baholash tizimi takomillashtiriladi;
Inson kapitali indeksi (Human capital index) va boshqa nufuzli global reytinglarda Oʻzbekiston Respublikasining mavqeini mustahkamlash yuzasidan idoralararo hamkorlik asosida chora-tadbirlar amalga oshiriladi.
Shuningdek:
Taʼlim inspeksiyasi va uning Qoraqalpogʻiston Respublikasi, Toshkent shahar va viloyatlar boshqarmalariga 2021-yil 1-yanvardan boshlab taʼlim tashkilotlarida hujjatli va sayyor tekshiruvlar oʻtkazish huquqi beriladi.
a) hujjatli tekshiruv taʼlim tashkiloti tomonidan taqdim etilgan hisobotlar va maʼlumotlar, shuningdek uning faoliyati toʻgʻrisida Taʼlim inspeksiyasida mavjud boʻlgan (shu jumladan, tizimida taʼlim muassasasi mavjud boʻlgan vazirliklar va idoralarning axborot tizimlari, tashkilotlar va davlat organlaridan olingan) hujjatlar hamda maʼlumotlarni tahlil qilish asosida taʼlim tashkilotiga bormasdan oʻtkaziladi;
b) tadbirkorlik subyekti hisoblanadigan taʼlim tashkilotlarida hujjatli tekshiruvlar oʻtkazish Taʼlim inspeksiyasi va uning hududiy boshqarmalari tomonidan tadbirkorlik subyektlarining faoliyatini tekshirishlarni muvofiqlashtirish boʻyicha vakolatli organni xabardor qilmasdan va uning ruxsatini olmasdan amalga oshiriladi;
v) sayyor tekshiruv taʼlim tashkilotiga tashrif buyurgan holda amalga oshiriladi va taʼlim tashkiloti tomonidan taʼlim toʻgʻrisidagi qonun hujjatlarining bajarilishi va taʼlim sifati holati tekshiriladi;
g) tadbirkorlik subyektlari hisoblanadigan taʼlim tashkilotlarida sayyor tekshiruvlar tadbirkorlik subyektlarining faoliyatini tekshirishlarni muvofiqlashtirish boʻyicha vakolatli organni xabardor qilish tartibida amalga oshiriladi;
d) sayyor tekshiruvlar taʼlim tashkilotidagi qonunchilik buzilishi holatlari boʻyicha jismoniy va yuridik shaxslarning murojaatlari, ommaviy axborot vositalari maʼlumotlari, boshqa axborot manbalari yoki Taʼlim inspeksiyasida mavjud boʻlgan maʼlumotlar asosida taʼlim tashkilotlari faoliyatining xavf-tahlili natijalari asosida oʻtkaziladi.
Muhokamalarda shu yilning 29-avgustiga qadar qatnashishingiz mumkin.
