Forum 1,5 mingdan ortiq ishtirokchini, jumladan, 9 ta mamlakat biznes delegatsiyalarini jamladi, bu Oʻzbekiston va butun mintaqaning jadal rivojlanayotgan bozoriga yuqori qiziqishdan dalolat beradi. Ushbu forumda Oʻzbekiston Respublikasi Investitsiyalar, sanoat va savdo vazirining oʻrinbosari Xurram Teshabayev spiker sifatida qatnashdi.
Soʻnggi yillarda Oʻzbekistonda chakana savdo hajmi 25,5 milliard dollardan oshdi, bu barqaror iqtisodiy oʻsish va xalqaro hamkorlik kuchayib borayotganini tasdiqlaydi.
Forum ishtirokchilari logistika infratuzilmasini modernizatsiya qilish, MDH mamlakatlaridagi ishlab chiqaruvchilar oʻrtasidagi hamkorlikni chuqurlashtirish hamda chakana savdoga sunʼiy intellekt va geomarketing singari yangi texnologiyalarni joriy etish kabi muhim yoʻnalishlarni muhokama qildilar.
Forum chakana savdo va elektron tijorat sohasida uzoq muddatli hamkorlik aloqalarini oʻrnatish va yangi tashabbuslarni muhokama qilishga qaratilgan tajriba almashish va ishbilarmonlik aloqalarini oʻrnatish uchun oʻziga xos maydonga aylandi, deb xabar beradi Investitsiyalar, sanoat va savdo vazirligi matbuot xizmati.
