Oʼzbekiston taekvondo WT assotsiatsiyasiga qarashli "Universal" sport majmuasida 3 ta davlat sportchilari ishtirokida xalqaro oʼquv-mashgʼulot yigʼini oʼtkazilmoqda. 19 oktabr kuni start olgan mazkur yigʼin 28 oktabrga qadar davom etadi. Unda 22 nafar taekvondochi boʼlajak xalqaro musobaqalarga tayyorgarlik koʼrmoqda.
Unda oʼzbekistonlik taekvondochilar bilan birga Qozogʼiston va Rossiya mamlakatining sportchilari ham ishtirok etishmoqda. Xalqaro yigʼin davomida ushbu davlatlar sportchilari oʼrtasida sparringlar ham tashkil etiladi. Bu esa oʼz navbatida taekvondochilar uchun boʼlajak musobaqalar oldidan ayni muddao boʼladi.
