Yangi shartnomaga muvofiq, 2021-yil 22-noyabrdan boshlab airBaltic Uzbekistan Airwaysning Toshkent va Riga oʻrtasidagi reyslarida oʻz marketing kodlarini oʻrindiqlar kvotasini cheklovsiz joylashtiradi. Shunday qilib, airBaltic mijozlari uchun Oʻzbekiston va Markaziy Osiyodagi shaharlar bilan aloqa yaxshilanadi, Uzbekistan Airways yoʻlovchilari esa Yevropa airBaltic tarmogʻining qulay imkoniyatlaridan foydalanish huquqiga ega boʻladi, deb xabar beradi “Uzbekistan Airways” AJ matbuot xizmati.

“Biz airBaltic bilan hamkorligimizni kengaytirish va Yevropada yoʻnalish tarmogʻini yanada mustahkamlashdan mamnunmiz. Oʻzbekiston dunyodagi eng tez rivojlanayotgan sayyohlik yoʻnalishlaridan biri boʻlib, airBaltic bilan hamkorlik yoʻlovchilarga Yevropa shaharlaridan Oʻzbekistonga – Markaziy Osiyo durdonasi – Toshkent xab aeroporti orqali yanada qulay sayohat qilish imkonini beradi deb ishonamiz” – deya taʼkidladi Uzbekistan Airways Boshqaruv raisi.

Volfgang Rays (Wolfgang Reuss), airBaltic yoʻnalish tarmogʻini boshqarish boʻyicha yetakchi vitse-prezidenti: “Biz Oʻzbekistondan Riga va boshqa davlatlarga ham qulay va arzon sayohat qilish imkoniyatini taklif etishga intilamiz. Ushbu qadam bilan biz Uzbekistan Airways aviakompaniyasi bilan vaqt sinovidan oʻtgan hamkorligimizni yanada yaxshilaymiz va Oʻzbekiston bilan Latviya oʻrtasidagi havo qatnovini mustahkamlaymiz”.