Navoiy kon-metallurgiya kombinatiga qarashli “Caterpillar” va “BelAZ” korxonalarida ishlab chiqarilgan ikkita zamonaviy maxsus togʻ-kon texnikasi ikki kun ichida sinovdan oʻtkazish uchun GTL yoqilgʻining birinchi partiyasi bilan toʻldirildi. GTL dizel yoqilgʻisi quyilgan NKMK texnikalari eng yaxshi texnik, ekspluatatsiya va ekologik koʻrsatkichlarni namoyish etdi. Yaqin vaqt ichida NKMK ehtiyojlari uchun Oʻzbekiston Respublikasi tovar-xom ashyo birjasi savdo platformalari orqali 5 ming tonna dizel yoqilgʻisi yetkazib berish rejalashtirilgan.
GTL dizeli yuqori texnik koʻrsatkichlarga ega va tarkibida oltingugurt miqdori deyarli nolga teng boʻlgan, atmosferaga juda kam miqdorda ifloslantiruvchi moddalarni chiqaruvchi mahsulotdir. GTL dizelini dizel dvigatellarida sof holda yoki uni aralashtirish uchun xom ashyo sifatida qoʻllash mumkin. GTL dizeli anʼanaviy dizel yoqilgʻisiga qaraganda, ifloslantiruvchi moddalarni 70% gacha kam chiqaradi, uning toza va toʻliq yonishi esa dvigatelda choʻkindilarni kamaytirishga yordam beradi. Bu esa, oʻz navbatida, texnikaning ishlash muddatini uzaytiradi va unga texnik xizmat koʻrsatish xarajatlarini sezilarli darajada kamaytiradi.
“Uzbekistan GTL” «premium-klass» toifasidagi sintetik dizel yoqilgʻisi Oʻzbekiston Respublikasi tovar-xom ashyo birjasining savdo platformalari orqali sotiladi.
“Uzbekistan GTL” zavodining quvvatlari yiliga 1 million tonnagacha dizel yoqilgʻisini ishlab chiqarish imkonini beradi.
GTL dizel yoqilgʻisi Euro-6 (YEN15940) Yevropa ekologik standarti va OʼzDSt EN 15940:2022 milliy standartining yuqori talablariga toʻliq javob beradi, deb xabar beradi Energetika vazirligi matbuot xizmati.
