Ushbu mavzu boʻyicha avval ham rasmiy tushuntirishlar berilgan edi, biroq maʼlumotlar buzilishi davom etmoqda.

Toshkent shahri hokimligining tushuntirishicha, viloyatlardan Toshkentga avtomobillar kirishiga hech qanday cheklov yoki taqiqlar joriy etilmayapti.

Taʼkidlanishicha, gap nazorat-oʻtkazish punktlarini modernizatsiya qilish va ular negizida zamonaviy transport tugunlarini yaratish haqida bormoqda. Nazorat-oʻtkazish punktlarining bir qismi shahar tashqarisiga koʻchiriladi, bir qismi qayta quriladi. Bu hududlarda katta avtoturargohlar, kempinglar, dam olish joylari va, eng muhimi, shaharga tez va qulay yetib olish imkonini beradigan rivojlangan jamoat transporti infratuzilmasi barpo etiladi.

«Bu qoʻshimcha imkoniyat, majburiyat emas. Haydovchilar oʻz xohishiga koʻra shaharga kirishda avtomobilni qoldirib, yoʻlni jamoat transportida davom ettirishi yoki avvalgidek shaxsiy avtomobilida shaharga kirishi mumkin boʻladi. Bunday “Park & Ride” modeli dunyoning yetakchi megapolislarida keng qoʻllaniladi va faqat transport vaziyatini yaxshilash hamda aholi turmush sifatini oshirishga qaratilgan«, — deyiladi bayonotda.

Toshkent shahri aholisi uchun ushbu chora-tadbirlar transport yuklamasini kamaytirish, tirbandliklarni kamaytirib, ekologik holatni yaxshilashni anglatadi. Poytaxt mehmonlari uchun esa — shaharning markaziy qismida toʻxtash joylarini izlash zaruratidan xalos boʻlish va harakatlanishning eng qulay usulini tanlash imkoniyatini beradi.

Shunday qilib, gap taqiqlar yoki cheklovlar haqida emas, balki fuqarolar uchun tanlovni kengaytiradigan va shaharning umumiy qulaylik darajasini izchil oshiradigan transport oqimlarini boshqarishning yanada oqilona, zamonaviy va moslashuvchan tizimini shakllantirish haqida ketmoqda.