Бул илажлар 2030-жылға шекем жергиликли жолаўшы тасыўды раўажландырыў стратегиясы жойбарында нәзерде тутылған.
Жойбарға бола, 2028-жылдың ақырына шекем "Қоқанд — Поп — Наманган — Әндижан — Марғилан — Қоқанд" айланба жөнелисиндеги электропоездлардың қатнаўы күнине бир мәртеден еки мәртеге арттырылады.
Бул илажды әмелге асырыў Транспорт министрлиги, Әндижан, Наманган ҳәм Ферғана ўәлаятларының ҳәкимликлери және "Өзбекстан темир жоллары" АЖға жүклениўи усыныс етилген.
Ҳүжжетте буның ушын қосымша қаржы ажыратыў нәзерде тутылмаған.
2028-жылдың ақырына шекем Поп темир жол станциясы ҳәм Наманган автовокзалы арасында турақлы микроавтобус қатнаўын шөлкемлестириў де режелестирилген.
Бул жолаўшыларға темир жол ҳәм автобус транспорты арасында қолайлы байланыс жаратыў имканиятын береди.
Стратегия жойбарында және бир әҳмийетли реже бар: 2027-жылдың ақырына шекем "Ташкент — Әндижан" тезжүрер электропоездлар жөнелисин Самарқандқа шекем созыў.
Нәтийжеде "Әндижан — Самарқанд" тиккелей темир жол қатнаўын жолға қойыў усыныс етилген.
Бул Ферғана ойпатлығын Ташкент, Сырдәрья, Жиззақ ҳәм Самарқанд ўәлаятлары менен байланыстырады.
Темир жол инфраструктурасы да жаңаланады
Жойбарда 2024-2026-жылларда әмелге асырылған жумыслар да атап өтилген.
Усы дәўирде үш ЭП3Д тез жүрер электропоезды сатып алынған. Олар:
"Ташкент — Хожикент";
"Қоқанд — Наманган — Әндижан — Қоқанд";
"Ташкент — Бекабад" жөнелислеринде хызмет көрсетпекте.
Сондай-ақ, "Ташкент-Ангрен-Поп" участкасындағы төрт тартыў подстанциясының қуўатлылығы арттырылған.
Мәмлекетлик-жеке меншик шериклик тийкарында модернизацияланыўы ҳәм басқарыўға берилиўи режелестирилген объектлер қатарына Қоқанд темир жол вокзалы ҳәм Наманган аэропорты да киргизилген.
