Бүгинги күнде Өзбекстан сыртқы саўдасы улыўма көлеминиң дерлик 30 проценти Россия, Армения, Беларусь, Қазақстан, Қырғызстан ҳәм Тәжикстан үлесине туўра келмекте.

Еслетип өтемиз, 2025-жылы Өзбекстан ЕАРБ қатнасыўшысы болған жетинши мәмлекет болды. 2026-жылдың өзинде Банк республикамызда инвестициялық портфельди қәлиплестириў ҳәм өзбекстанлы шериклер менен бирге ислесиўди кеңейтиў арқалы жойбарларды әмелге асырыўға киристи.

ЕАРБ мәмлекетлери арасында Өзбекстанның ең ири саўда шериги Россия болып қалмақта. 2025-жылдың жуўмағы бойынша еки мәмлекет арасындағы өз-ара саўда көлеми 11,7 миллиард АҚШ долларын қураған. Екинши орында 4,7 млрд доллар көрсеткиш пенен Қазақстан тур. Өзбекстанның Банкке ағза мәмлекетлер менен товар алмасыўының дерлик 85 проценти Россия ҳәм Қазақстан үлесине туўра келеди.

ЕАРБ мәмлекетлеринен импорт қурамында нефть ҳәм нефть өнимлери, қара металлар, ағаш, дәнли егинлер ҳәм металлургия өнимлери үстинлик етеди. Өз гезегинде, Өзбекстан жеңил санаат ҳәм агросанаат өнимлерин, соның ишинде, кийим-кеншек, мийўе ҳәм ғоза, овош, пахта, автомобиль комплектлеўши бөлеклерин экспорт етпекте.

Саўда-экономикалық бирге ислесиўдиң кеңейип атырғаны ҳәм Өзбекстанның Евроазия раўажланыў банкинде қатнасып атырғаны инвестицияларды тартыў, қоспа инфраструктуралық ҳәм санаат жойбарларын әмелге асырыў, өндирис кооперациясын раўажландырыў, Евроазия регионы мәмлекетлери менен экономикалық байланысларды буннан былай да беккемлеў ушын қосымша имканиятлар жаратпақта.