Ол автомобиль жоллары, темир жол ҳәм авиациядағы кемшиликлер, жолаўшылар ушын жаратылған шараят, билет баҳалары ҳәм хызмет көрсетиў сапасын сынға алды.

Ўәлаят басшысы Сурхандәрьяны Ташкент пенен байланыстырыўшы М39 автомобиль жолының Байсыннан кейинги бөлегиниң жағдайы қанаатландырарсыз екенин айтты.

"М39 жолын ҳәмме меннен жақсы биледи. Байсыннан өткеннен кейин жүрип болмайды. Таксилеримиз бақырып атыр, автобусшылар бақырып атыр. Жүзине қараўға көзимиз қалмады", - деди Қосимов.

Ол темир жол тараўындағы жағдайды да кескин сынға алды.

"Темир жолда улыўма шараят жоқ. Вагонға минген адам Ташкентке бараман дегенше аўырып қалып атыр. Суўытыў системасы ислемейди, шараят жоқ, билет жоқ, вокзалда шараят жоқ", - деди ҳәким.

Қосимовтың атап өтиўинше, Термизден Сариосиёға қатнайтуғын қалалараралық поездларда да жолаўшыларды тасыў ушын зәрүр шараят жоқ. Ол транспорт тараўында қадағалаўды тәмийинлеўи керек болған жуўапкерлердиң жумысын да сораўға қойды.

"Неге транспорт прокуратурасы тамашагөй? Не ушын ол жерде нызам үстинлиги тәмийинленбейди? Не ушын шара көрилмейди? Транспорт басқармасы қай жерге қарайды?" - деди ол.

Ўәлаят басшысы авиация тараўындағы жағдайдан да наразылығын билдирди. Ол авиабилетлердиң баҳасы еки есеге артып кеткени, билет табыў қыйынлығы ҳәм таныс-билислик арқалы билет алыў жағдайларының бар екенлигин сынға алды.

"Авиабилетлерде улыўма уятлы. Баҳасы еки есе болып кеткен. Монополия деген шөлкем тамашагөй. Қалай барсын кәмбағал адам? Бул билет баҳасына қарап болмайды. Улыўма таныс-билиссиз билет таўып болмайды", - деди Қосимов.

Оның пикиринше, билет сатыўы толық ашық-айдын болыўы, билетлер онлайн түрде ашық жәрияланыўы ҳәм жасалма тосқынлықларға шек қойылыўы керек.

"Еки кассир қәлеген жумысын ислеўи керек емес. Танысы бар билет алыўы керек емес. 10 сўмлық билетти 25 сўмнан сатып атыр. Алдап, жасалма тосықлар менен", - деди ўәлаят ҳәкими.

Қосимов Сариосиё вокзалындағы шараятларды да сынға алды. Атап айтқанда, поезддан түскен жолаўшылар ыссыда көшеде күтиўге туўра келип атырғанын айтты.

"Неге Сариосиёға қайтып келген адам көшеде ыссыда отырыўы керек? Не ушын салынған өзи зал? Ҳеш ким бийпул тасып атырған жоқ. Билет сатып алып атыр ма? Пулға хызмет етиў керек оған", - деди ол.

Ўәлаят басшысы жолаўшыларға хызмет көрсетиў мәдениятын да сынға алды. Ол сырт елде транспорт хызметлеринде жолаўшыларға мүнәсибет ҳәм сервиске итибар жоқары екенин атап өтип, Өзбекстанда да хызмет сапасына қатаң қатнаста болыў зәрүрлигин атап өтти.

Сондай-ақ, ҳәким поездлардағы санитариялық жағдай үстинен қадағалаўды күшейтиў зәрүрлигин айтты.

"Оператив хызметкерлериңиз қай жерге қарап атыр? Буның СЭС деген шөлкеми бар ма өзи? Олар қай жерге қарайды?" - деди Қосимов.

Ҳәким жуўапкерлерге бир ҳәпте ишинде Ташкентке қатнайтуғын поездларды, сондай-ақ, Сариосиё жөнелисиндеги қалалараралық поездларды толық тексериў ҳәм зәрүр үскенелер менен тәмийинлеў бойынша тапсырма берди.

"Келеси ҳәпте дүйшемби күни азанда вокзалға бараман. Вагонды бирме-бир, Ташкентке кететуғын составты да толық тексерип, ҳәммесин үскенелеп бериўиңиз шәрт. Сариосиёға қатнайтуғын қалалар аралық поезды да. Жүк тасыўларын да, ҳәммесин қадағалаўға аласыз", - деди ол.

Сондай-ақ, аэропорт ҳәм аэровокзаллардағы шараятларды да толық үйрениў, ҳәжетханалардан баслап жолаўшыларға хызмет көрсетиўге шекемги барлық тәреплерди тексериў ўазыйпасы қойылды.

Қосимов жуўапкерлерден белгиленген мүддетте анық илажлар көриўди талап етти. Ол байрам алдынан транспорт объектлери, поездлар ҳәм вокзалларда жолаўшылар ушын мүнәсип шараят жаратыў, хызмет сапасын жақсылаў ҳәм билет сатыўда ашық-айдынлықты тәмийинлеў зәрүрлигин атап өтти.