Мәмлекетимиз басшысы Әзербайжан Президентиниң Өзбекстанға мәмлекетлик сапары, әлбетте, тарийхый әҳмийетке ийе екенин терең қанаатланыўшылық пенен атап өтти.
Шавкат Мирзиёев быйылғы саммиттиң тийкарғы нәтийжеси Мәңги дослық ҳаққындағы шәртнамаға қол қойылғаны екенин атап өтти. Бул, Өзбекстан жетекшисиниң сөзлерине бола, бирге ислесиўди тереңлестириў, бирге ислесиў ушын имканиятларды кеңейтиў ҳәм улыўма келешекти қурыўға биргеликтеги умтылыстың көриниси болып есапланады.
Сапар етиў даўамында Аўқамласлық қатнасықларын тереңлестириў бойынша жаңа басламаларды ислеп шығыў ҳәм әмелге асырыўдың нәтийжели механизмине айланған Жоқары мәмлекетлераралық кеңестиң үшинши мәжилиси де болып өтти.
Мәмлекетимиз басшысы Әзербайжанның турақлы экономикалық раўажланыўы ҳәм халықаралық майдандағы абырайы артып атырғанын атап өтти. Илҳам Алиевти мәмлекеттиң аймақлық пүтинлиги тикленгени ҳәм әзелий Әзербайжан жерлери қайтарылғаны менен және бир мәрте қутлықлады.
Социаллық инфраструктура жеделлик пенен қурылып атырған, жумыс орынлары жаратылып атырған Қарабағты қайта тиклеўге айрықша итибар қаратылды.
- Әзербайжан бизиң исенимли аўқамласымыз, стратегиялық шеригимиз ҳәм туўысқан мәмлекетимиз. Қатнасықларымыздың тийкарында улыўма цивилизация коды - улыўма тарийхый тамырлар, көп әсирлик дослық, уқсас мәденият ҳәм дәстүрлер жатады, - деди Өзбекстан жетекшиси.
Саммит алдынан үлкен таярлық жумыслары әмелге асырылғаны атап өтилди. Ҳүкиметлераралық комиссия, Исбилерменлер кеңесиниң мәжилислери, Аймақлар форумы нәтийжели өтти.
Сөйлесиўлерде Президентлер көп қырлы қатнасықлардың барлық бағдарларын ҳәр тәреплеме додалады, әҳмийетли бағдарлар бойынша Ҳүкиметлераралық комиссияның жәрдемши баслықларының есабатларын тыңлады.
Бул, бәринен бурын, саўда, санаат кооперациясы, энергетика, транспорт, мәденият ҳәм басқа да тараўлар болып есапланады.
Тәреплер сиясий сөйлесиўди беккемлеў, парламентлер ҳәм ҳүкиметлер, тармақ ведомстволары ҳәм аймақлар арасындағы жедел байланысларды қоллап-қуўатлаўға келисип алды.
Экономика мәселелерине айрықша итибар қаратылды. Товар алмасыў көлемин 1 миллиард долларға жеткериў имканиятлары көрип шығылды. Бүгинги күнде бул әҳмийетли бағдарға ерисиў бойынша анық илажлар белгиленген тийисли бағдарлама қабыл етилди.
Санаат кооперациясында жаңа өсиў ноқатлары белгиленди.
Бул сапар етиў шеңберинде энергетика, геология, химия, қурылыс, қаржы, аўыл хожалығы ҳәм басқа да тармақлардағы кооперация жойбарларының салмақлы портфельи қәлиплестирилген.
Бул жойбарларды алға қойыўда буннан бир неше жыл бурын шөлкемлестирилген Инвестиция қоры әҳмийетли роль атқармақта.
Аймақлардың имканиятларынан максимал дәрежеде пайдаланыўға келисип алынды. Усы мақсетте усы айда Ташкент қаласы, Бухара ҳәм Наманган ўәлаятларының ҳәкимлери Әзербайжанға барды.
Транспорт-транзит тараўы, соның ишинде, Транскаспий коридорын биргеликте раўажландырыў, логистика инфраструктурасының нәтийжелилигин арттырыў, тасыўларды хошаметлеў бирге ислесиўдиң және бир әҳмийетли бағдары болып есапланады.
Тығыз мәдений-гуманитарлық байланыслар халықларымыз арасындағы дослықтың исенимли көпири болып хызмет етпекте.
Бүгин Низамий Гянджеви атындағы педагогика университетиниң жаңа имараты ашылады, Жаңа Ташкентте "Әзербайжан" паркин қурыўға старт берилди.
Жылдың ақырына шекем Өзбекстанда Әзербайжан мәденияты күнлери ҳәм Әзербайжанда жоқары оқыў орынлары ректорларының екинши форумы өткериледи.
Низамий Гянджеви ҳәм Әлийшер Наўайының әдебий мийрасына бағышланған биргеликтеги көркем фильм жаратылыўы үлкен дөретиўшилик ўақыя болады.
ФИФАның қарарына бола, келеси жылы Өзбекстан ҳәм Әзербайжан биргеликте жаслар арасында футбол бойынша жәҳән чемпионатына басшылық ететуғыны атап өтилди.
Бул үлкен спорт әнжуманы шеңберинде "Еки мәмлекет - бир чемпионат" кең көлемли бағдарламасын қабыл етиўге келисип алынған.
Сөзиниң жуўмағында мәмлекетимиз басшысы әзербайжанлы кәсиплесине усыныс ҳәм басламаларды қоллап-қуўатлағаны ушын миннетдаршылық билдирди. Бул тарийхый сапардың жуўмақлары шерикликти анық мазмун менен байытатуғынына, биргеликтеги жойбарлар ҳәм дос мәмлекетлеримиздиң турақлы раўажланыўы ушын жаңа имканиятлар ашатуғынына исеним билдирди.
