Транспорт вазирлигининг маълум қилишича, «Тошкент шаҳар йўловчи ташишни мониторинг ва назорат қилиш» давлат муассасаси назоратчилари томонидан автобусларда тўлов маданиятини оширишга қаратилган рейд тадбирлари кучайтирилган.

15 август куни Чилонзор туманида ўтказилган навбатдаги рейд давомида назоратчилар автобусдан тушган фуқаро М.М.дан йўл ҳақи тўланганини тасдиқловчи ҳужжатни кўрсатишни сўраган.

Бироқ йўловчи турли важларни келтириб, назоратчи талабини бажармаган ва жамиятда юриш-туриш қоидаларини бузган ҳолда қаршилик кўрсатган. Фуқаронинг шахсига аниқлик киритиш жараёнида эса жанжал чиқариб, назоратчига нисбатан куч ишлатишга уринган.

Мазкур ҳолат назоратчига бириктирилган боди-камера орқали қайд этилган.

Ҳолат юзасидан 24 сентябрь куни Тошкент шаҳар жиноят ишлари бўйича Чилонзор туман судида очиқ суд мажлиси ўтказилди. Суд қарорига кўра, ҳуқуқбузар М.М.га 3 сутка маъмурий қамоқ жазоси тайинланди.