Тергов маълумотларига кўра, гумонланувчи Б.М. ва С.Ш.нинг ишончига кириб, арзон нархда буғдой сотиб олиш ва уни қайта ишлаш орқали катта даромад олиш мумкинлигини важ қилиб, улардан жами 1,7 миллиард сўмни фирибгарлик йўли билан қўлга киритган.
Шунингдек, у М.Т.га тегишли МЧЖ учун Тошкент шаҳри Яккасарой туманидаги 50 сотих ер майдони бўйича суд томонидан бекор қилинган қарорни қайта тиклаб беришни ваъда қилиб, эвазига 95 минг АҚШ долларини олгани аниқланган.
Бошқа бир ҳолатда эса А.А. «Facebook» ижтимоий тармоғи орқали И.Н. билан танишиб, ўзини прокуратура ходими сифатида таништирган. У 2014 йилда ишлаб чиқарилган, баҳоси 8,5 минг АҚШ долларига тенг «Cobalt» автомобилини янги «Gentra»га алмаштириб беришни ваъда қилиб, автомашинани эгаллаб олган. Кейинчалик ушбу автомашинани бошқа шахсга сотиб, тушган маблағни шахсий эҳтиёжлари учун сарфлаган.
Терговда аниқланишича, А.А. яна бир фуқаро А.К.нинг ишончига кириб, унинг хонадон калитининг нусхасини қўлга киритган. А.К. саёҳатда бўлган вақтда хонадонга ноқонуний кириб, жуда кўп миқдордаги тилла тақинчоқларни ўғирлаб кетган.
2026 йил 18 июнь куни А.А.га нисбатан Жиноят кодексининг 168-моддаси 4-қисми «а» банди, 169-моддаси 4-қисми «а» банди ҳамда бошқа моддалари билан айблов эълон қилиниб, унга нисбатан қамоқ эҳтиёт чораси қўлланилди.
Бош прокуратура мазкур шахснинг хатти-ҳаракатларидан жабрланган ёки у ўзини прокуратура ходими сифатида таништириб, пул маблағларини ўзлаштиргани ҳақида маълумотга эга бўлган фуқароларни «1161» рақамли Ишонч телефони орқали мурожаат қилишга чақирди. Мурожаат қилувчиларнинг шахси сир сақланиши кафолатланиши таъкидланди.
Шу билан бирга, фуқароларга ўзини давлат органлари ходими сифатида таништириб, хизмат эвазига пул талаб қилувчи шахсларга ишонмаслик тавсия этилди.
