Ikkinchi jahon urushi yillarida fashizmga qarshi kurashgan, front ortida mehnat qilgan insonlarga hurmat va ehtirom ko‘rsatish ushbu sana mazmunining ajralmas qismi hisoblanadi. Prezident qaroriga muvofiq, ayni kunlarda mamlakatimiz bo‘ylab faxriylar holidan xabar olinib, ularning jasorati va mehnati munosib qadrlanmoqda.

Chilonzor tumanida istiқomat qiluvchi Tamara Tsokolova xonadonida ham bayramona muhit hukm surdi. Ichki ishlar vaziri general-leytenant Aziz Toshpo‘latov faxriyning uyiga tashrif buyurib, Prezident yo‘llagan tabrikni o‘qib eshittirdi. Leningrad qamalini boshidan kechirgan onaxonга davlat mukofotlari topshirilib, mustahkam salomatlik tilandi.

Shuningdek, bolaligi kontslagerda o‘tgan Mariya Degtyarovaga ham davlat rahbarining tabriklari va sovg‘alari yetkazildi. Urush yillarining og‘ir xotiralarini boshdan kechirgan faxriy mehmonga minnatdorlik bildirdi.

Ikkinchi jahon urushi qatnashchisi Nikolay Petrunin ham bayram munosabati bilan e‘zozlandi. Qozog‘istonda tug‘ilib, keyinchalik hayotini Toshkent bilan bog‘lagan faxriyga tabriknoma o‘qib eshittirilib, esdalik sovg‘alari topshirildi.

Anna Karimova, Mariya Kamarova, Natalya Spivak, Nadejda Kudrizkaya va Alla Funtikova kabi faxriylar xonadonlarida bo‘lib o‘tgan uchrashuvlarda ham tinchlik, sabr-matonat va inson qadri haqida samimiy suhbatlar kechdi.

Faxriylar davlat va xalq e‘tiboridan mamnun ekanliklarini bildirib, bugungi tinch va osoyishta hayotning qadriga yetish lozimligini ta‘kidlashdi.

Bu kabi tadbirlar hududiy ichki ishlar organlari tomonidan ham davom ettirilib, urush va mehnat faxriylariga hurmat-ehtirom ko‘rsatish ishlari izchil amalga oshirilmoqda.