Surxondaryo viloyati bojxona boshqarmasi Kontrabandaga qarshi kurashish bo‘limi xodimlari tomonidan Davlat xavfsizlik xizmati va Chegara qo‘shinlari bilan hamkorlikda Termiz tumanida tezkor-qidiruv tadbiri o‘tkazildi.

Termiz xalqaro savdo markazida amalga oshirilgan tadbirda oldindan kuzatuvga olingan 27 yoshli qo‘shni davlat fuqarosi ichki a’zolariga shubhali buyumlarni yashirgani aniqlandi.

Ushbu shaxs to‘g‘ri ichak qismiga joylagan 3 dona polietilen o‘ramni 36 yoshli boshqa fuqaroga topsirayogan vaqtida qo‘lga olindi.

O‘ramlar belgilangan tartibda, xolislar ishtirokida ochib ko‘rilganda, uning ichida 203 gramm og‘irlikdagi “opiy” giyohvandlik moddasi borligi ma’lum bo‘ldi.

Shu kunning o‘zida tezkor tadbir Termiz shahrida davom ettirilib, mazkur giyohvandlik vositalarini qabul qilib olishi kerak bo‘lgan zanjirning so‘nggi halqasidagi 40 yoshli fuqaro ham qo‘lga olindi.

Hozirda mazkur holat yuzasidan bojxona organlari tomonidan tergovga qadar tekshiruv harakatlari olib borilmoqda.